हरि घिमिरे, ०१ मंसिर । महोत्तरीमा सम्पन्न नेपाल क्रसर तथा खानी उद्योग व्यवसायी महासंघको तेस्रो केन्द्रीय अधिवेशनबाट कपिलवस्तुका हुमनाथ पौडेल केन्द्रीय सदस्यमा निर्वाचित भएका छन्। पौडेल बाणगंगाका एक प्रभावशाली क्रसर उद्योग व्यवसायी मात्र नभई कपिलवस्तु उद्योग वाणिज्य संघका वरिष्ठ उपाध्यक्ष पनि हुन्।
निर्वाचनपछि पौडेलले आफ्नो क्षेत्रका क्रसर तथा खानी उद्योग व्यवसायीहरूको समस्या समाधानका लागि दृढतापूर्वक काम गर्ने प्रतिवद्धता जनाएका छन्। उनले व्यवसायलाई व्यवस्थित गर्दै आर्थिक, सामाजिक, र वातावरणीय सन्तुलन कायम गर्न आवश्यक पहल गर्ने बताए।
क्रसर व्यवसायमा अनुभव र नेतृत्व क्षमता
हुमनाथ पौडेलको क्रसर उद्योग क्षेत्रमा लामो अनुभव र नेतृत्व क्षमताले उनलाई महासंघको नेतृत्वमा योगदान पुर्याउन सक्षम बनाउने विश्वास गरिएको छ। उनी व्यवसायीहरूका हकहित र वातावरणीय जिम्मेवारीबीच सन्तुलन कायम गर्दै व्यवसायलाई दीर्घकालीन बनाउने योजना लिएर अघि बढ्ने बताउँछन्।
अधिवेशनमा देशभरका व्यवसायीहरूको उत्साहजनक सहभागिता रहेको थियो। महासंघले व्यवसायको सुदृढीकरण, नीतिगत सुधार, र प्रविधिको प्रयोगमार्फत खानी तथा क्रसर उद्योगलाई थप दिगो बनाउनका लागि विविध निर्णयहरू गरेको छ।