दाङ, पौष २० ।
तुलसीपुर उपमहानगरपालिकामा महोत्सव आयोजना गर्ने संस्थाले अब २५ लाख रुपैयाँ सामाजिक उत्तरदायित्व कर तिर्नुपर्ने भएको छ । उपमहानगरपालिकाको कार्यपालिका बैठकले यस्तो निर्णय गरेको मेयर टीकाराम खड्काले जानकारी दिए ।
साथै, मनोरञ्जन करका रूपमा प्रत्येक टिकटको पाँच प्रतिशत रकम नगरलाई बुझाउनुपर्ने व्यवस्था गरिएको छ। मेयर खड्काका अनुसार, टिकटमा पारदर्शिता ल्याउन उपमहानगरपालिकाले अब आफैँ टिकट छापेर दिनेछ । यसअघि आयोजकले आफ्नै टिकट काट्ने भएकाले कर छलीको सम्भावना रहेकोमा नयाँ व्यवस्थाले यस्तो अवस्था अन्त्य गर्ने विश्वास व्यक्त गरिएको छ ।
यस वर्ष महोत्सव आयोजना गर्ने जिम्मा तुलसीपुर चेम्बर अफ कमर्सलाई दिने निर्णय भएको छ । उपमहानगरपालिकाले सामाजिक उत्तरदायित्व र मनोरञ्जन करको नयाँ नीति महोत्सव सञ्चालनमा पारदर्शिता कायम राख्न र नगरको आयस्रोत वृद्धि गर्न ल्याएको हो ।
नगरपालिकाले महोत्सव आयोजनाका लागि पारदर्शी र उत्तरदायी संरचना निर्माणमा जोड दिँदै यस प्रकारका कदम उठाएको छ । महोत्सवको आम्दानीलाई नगरको विकासमा उपयोग गर्ने उद्देश्यले नयाँ व्यवस्था गरिएको छ ।