फागुन १२ गते । विभेद रहित समतामूलक समाज निर्माणका लागि प्रदेश सरकार निरन्तर लागि परेको लुम्बिनी प्रदेश सामाजिक बिकास समितिका सभापति यमु गैरेले बताएका छन् । दलित सामाजिक बिकास केन्द्र (डिएसडिसी) कपिलवस्तुको आयोजनामा यशोधरा गाउँपालिका वडा नम्बर ३ तितिर्खामा आयोजित जीवन सुधार ज्ञान मेला, २०८१ को साेमबार उद्घाटन गर्दै उनले गैरसरकारी संस्थाहरुले यस्ता किसिमका कार्यक्रमको आयोजना गर्दै आफुले गरेका कामहरुको प्रभावकारिता देखाउनु राम्रो अभ्यास रहेको उल्लेख गरे ।
लुम्बिनी प्रदेश सभा सदस्य समेत रहेका गैरेले परियोजनाका सफलताहरु पनि समुदायमा देखिने र समुदायमा पनि प्रचार प्रसार हुने बताए । साथै संघ संस्थाहरुले कृषि तथा पशुपालन जस्ता कार्यहरुमा पनि जोड दिएमा किसानहरुको हित हुने उनको भनाइ छ ।
त्यसैगरी, जिल्ला समन्वय समिती कपिलवस्तुका प्रमुख बाबुराम आचार्यले जिवन सुधार मेला कपिलवस्तु जिल्लाकै नौलो कार्यक्रमको रुपमा रहेको उल्लेख गरे । साथै यस्ता कार्यक्रमहरु अन्य संघ संस्थाहरुले गर्न जरुरी रहेको उनले बताए ।
दलित सामाजिक बिकास केन्द्रको आयोजना, यशोधरा गाउँपालिकाको समन्वय र यूनाईटेड मिसन टु नेपालको सहयोगमा मेला संचालन गरिएको थियो । दलित सामाजिक बिकास केन्द्रले उक्त क्षेत्रमा गर्दै आएको बिभिन्न परियोजना मार्फत समुदायमा पारेको प्रभावहरुको प्रदर्शनी गर्नु पनि मेलाको एक महत्वपुर्ण उद्धेश्य रहेको संस्थाका कार्यकारी निर्देशक रामशरण रैदासले जनाए । यस जिवन सुधार ज्ञान मेलालाई संस्थाले गरेको कामलाई उजागर गर्नु र संस्थाको सामाजिक परिक्षणको रुपमा पनि बुझ्न उनले आग्रह गरे । मेलामा बिभिन्न स्टलहरुमा समुदायको उत्पादन र कृषि प्रबिधीका कुराहरु राखिएका थिए ।
दलित सामाजिक बिकास केन्द्रका अध्यक्ष सुरजमती पासीको अध्यक्षता, लुम्बिनी प्रदेश सभा सदस्य तथा सामाजिक बिकास समितीका सभापति यमु गैरेको प्रमुख आतिथ्यता रहेको कार्यक्रममा जिल्ला समन्वय समिती कपिलवस्तु प्रमुख बाबुराम आचार्य, उपप्रमुख रमेश कुर्मी, यशोधरा गाउँपालिका उपाध्यक्ष गुन्जादेवी मौर्य, गैरसरकारी संस्था महासंघ लुम्बिनी प्रदेश अध्यक्ष शुसिला बेल्बासे, गैरसरकारी संस्था महासंघ कपिलवस्तु अध्यक्ष जयप्रकाश पाण्डे, यशोधरा गाउँपालिका वडा नम्बर १ का अध्यक्ष अब्दुल कयुम खान, परियोजना कार्य क्षेत्रका समुहहरु, समुदायका ब्यक्तिहरु, बिभिन्न संघ संस्थाका प्रतिनिधीहरु, सर्वसाधारणहरु लगायतको सहभागिता रहेको थियो ।
आयोजित मेलामा महिलाहरुको क्षमता अभिबृद्धिको लागी कुर्सी दौड, हाँडी फोर र हाजिरी जवाफ प्रतियोगिता पनि गरिएको थियो । युनाईटेड मिसन टु नेपाल, अस्ट्रेलियन एआईडि र ट्रान्सफर्म एआईडि ईन्टरनेशनलको सहयोगमा उक्त मेला आयोजना गरिएको बताइएको छ ।