फागुन १३ गते । संस्कृति संरक्षणार्थ कपिलवस्तुको तौलिहवामा संचालन हुने ९ दिवसीय श्रीराम कथा महायज्ञको तयारीलाई तिब्र पारिएको छ । आउदो चैत्र १६ देखि २४ गते सम्म तौलिहवा स्थित बुद्धपद्म माध्यमिक बिद्यालयको खेल मैदानमा हुने महायज्ञको तयारीलाई तिब्र पारिएको आयोजक श्री रामकथा ज्ञान महायज्ञ मुल समितीले पत्रकार सम्मेलन मार्फत जनाएको छ ।
जिल्लामा क्रियाशिल आधा दर्जन बढी हिन्दुवादी संघ संगठनको सामूहिक आयोजनामा उक्त महायज्ञ संचालन हुने जनाइएको छ । कार्यक्रममा प्रमुख अतिथीको रुपमा रहेका लुम्बिनी प्रदेश सभा सदस्य मधुसुदन शरण चौधरीले धर्मजारण अभियानमा सबैको सोंच सकारात्मक रहनुपर्ने बताए । यो महायज्ञ सबैको साझा रहेकाले सनातनी धर्मको रक्षार्थ अव धर्मजागरण अभियानको शुत्रपात गर्नुपर्ने बेला आएको उनको भनाइ छ ।
यसैगरि, कपिलवस्तु नगरपालिकाका नगरप्रमुख सुदीप पौडेलले सबै धर्मको समान अस्तित्व रहने भएकाले आआफ्नो धर्म सम्बद्र्धनका लागि सबै एकजुट हुनुपर्नेमा जोड दिए । धर्मको संरक्षणार्थ हुन लागेको महायज्ञको सफलताको शुभकामना दिंदै उनले धर्म अनुसार ब्यवहार सबैले प्रस्तुत गर्न समेत आग्रह गरे ।
मुल समितिका निर्देशक अनिल तिवारीले संस्कृतिको संरक्षण, सम्बद्र्धन गर्ने र भक्तजनमा सकारात्मक सोंचको बिकास गर्दै रामराज्य जस्तै सुशासनयुक्त राज्य स्थापना गर्ने उदेश्य महायज्ञको रहेको उल्लेख गरे ।
महायज्ञमा भारतीय तथा नेपालका चर्चित बाचकले राम कथा बाचन गर्ने गरी महायज्ञ आयोजना गर्ने आयोजकले बताएका छन् । यद्यपि, प्रमुख वाचकका रुपमा मानव धर्मोत्थान संस्थान अयोध्याधामका अध्यक्ष आचार्य पण्डित रमोज वत्स जी महाराज (वत्स जी) रहेका आयोजकका सल्लाहाकार गणेशलाल कर्णले बताए ।
यसैबीच, महायज्ञको शुभारम्भ स्वरुप भूमिपुजन एवं ध्वजारोहण समारोह भने यहि फागुन १४ गते बुधबार बिहान ११ बजे हुने आयोजक सदस्य सुचिता श्रीवास्तवले जनाइन् ।
यस्तै, महायज्ञलाई सफल बनाउनका लागि विरेन्द्र प्रसाद चौधरीको अध्यक्षतामा ३१ सदस्यीय महायज्ञ आयोजक मूल समिति गठन गरिएको छ । जसको उपाध्यक्षमा माया ज्ञवाली, अशोक पाण्डेय र बृजेश भटरा, सचिवमा राजेश सोनी, कोषाध्यक्षमा सचिनम त्रिपाठी र सहसचिवमा हेमा थापा रहेका छन् ।
सदस्यहरुमा काशिनाथ पाठक, राकेश यादव, गिरजेशरण चौधरी, सुचिता श्रीवास्तव, अनिल क्षेत्री, शारदा पराजुली लगायत छन् । आयोजक समितिको सल्लाहकारमा अनिल कुमार तिवारी, डाक्टर सतिश उपाध्याय, बिजयलक्ष्मी सिंह, मुकुन्दराज सिग्देल लगायत रहेका छन् ।
वैदिक हिन्दु सनातन धर्म प्रचारका लागि भव्यताका साथ महायज्ञ आयोजना गर्न थालिएकोले जनाउँदै महायज्ञ सफल बनाउन आयोजक समितिका अध्यक्ष चौधरीले सबैसँग आग्रह गरे । कार्यक्रमको संचालन अमेरिका प्रसाद चौधरीले गरेका थिए ।