बाणगङ्गा, फागुन १४ । दोस्रो मुख्यमन्त्री कपिलवस्तु तिलौराकोट गोल्डकप फुटबल प्रतियोगिता सुरु भएको छ । लुम्बिनी प्रदेशका मुख्यमन्त्री चेतनारायण आचार्यले प्रतियोगिताको बुधवार उद्घाटन गरेका हुन् ।
उद्घाटन समारोहमा सम्बोधन गर्दै मुख्यमन्त्री आचार्यले खेलकुद क्षेत्रको विकासका लागि प्रदेश सरकार प्रतिबद्ध रहेको बताए । उनले खेलकुदले युवा पुस्तालाई अनुशासन, स्वास्थ्य र राष्ट्रप्रेमको भावना सिकाउने भएकाले यसको प्रवर्द्धन आवश्यक रहेको उल्लेख गरे । साथै, उनले बुद्ध रंगशालाको स्तरोन्नतिका लागि प्रदेश सरकारले स्थानीय पालिकासँग सहकार्य गर्ने प्रतिवद्धता व्यक्त गरे ।
मुख्यमन्त्री आचार्यले भने ”खेलकुद पूर्वाधारको विकास, खेलाडीहरूको क्षमता अभिवृद्धि तथा खेलकुद कार्यक्रमहरूको सञ्चालनका लागि स्थानीय तहहरूसँग सहकार्य गरेर अगाडि बढ्ने योजना छ ।”
कार्यक्रममा लुम्बिनी प्रदेश सभाका सदस्य विष्णु पन्थीले खेलकुद क्षेत्रको विकासले पर्यटन प्रवर्द्धनमा समेत योगदान पुर्याउने बताए । उनले खेलकुद प्रतियोगिताहरूले आन्तरिक तथा बाह्य पर्यटन आकर्षित गर्ने भएकाले सरकारले दीर्घकालीन योजना निर्माण गर्नुपर्ने आवश्यकता औंल्याए ।
बाणगंगा नगरपालिकाका प्रमुख चक्रपाणी अर्यालले स्थानीय तहको पहलमा खेल क्षेत्रको प्रवर्द्धन गर्नुपर्नेमा जोड दिए। उनले स्थानीय युवा प्रतिभालाई प्रोत्साहन गर्न आवश्यक वातावरण सिर्जना गर्नुपर्ने बताए । साथै, खेल पूर्वाधार निर्माण तथा खेलाडीहरूको क्षमता अभिवृद्धिका लागि स्थानीय सरकारको भूमिका महत्वपूर्ण रहने उनले उल्लेख गरे ।
यसैबीच, प्रतियोगिताको उद्घाटन खेलमा सङ्कटा फुटबल क्लबले आयोजक कपिलवस्तु ११ लाई १–० गोलले पराजित गर्दै सेमिफाइनलमा स्थान सुरक्षित गरेको छ । खेलको पहिलो हाफ गोलरहित बराबरीमा सकिएको थियो भने दोस्रो हाफको अन्त्यतिर थप गरिएको २ मिनेटमा उत्तम शाहीले निर्णायक गोल गर्दै सङ्कटालाई जित दिलाए । संकटाका नायक बनेका उत्तम शाही खेलको ‘म्यान अफ द म्याच’ घोषित भए ।
प्रतियोगितामा विजेता टोलीले ११ लाख ११ हजार १११ रुपैयाँ नगद पुरस्कार प्राप्त गर्नेछ भने उपविजेता टोलीले ५ लाख ५५ हजार ५५५ रुपैयाँ नगदसहित शिल्ड, मेडल र प्रमाणपत्र प्राप्त गर्नेछ ।