बाणगंगा, ०९ भदौ । संघीय मामिला तथा सामान्य प्रशासन मन्त्रालयले सार्वजनिक गरेको स्थानीय तह संस्थागत क्षमता स्वमूल्यांकन (लिजा) नतिजामा कपिलवस्तु जिल्लाभित्र बाणगंगा नगरपालिका उत्कृष्ट ठहरिएको छ ।
मन्त्रालयले प्रत्येक वर्ष स्थानीय तहको शासकीय व्यवस्थापन, संगठन तथा प्रशासन, वार्षिक बजेट तथा योजना कार्यान्वयन, वित्तीय व्यवस्थापन, सार्वजनिक सेवा प्रवाह, भौतिक पूर्वाधार, सामाजिक समावेशीकरण, वातावरण तथा विपद् व्यवस्थापन र सहकार्य–समन्वय गरी नौवटा सूचकमा आधारित मूल्याङ्कन गर्दै आएको छ ।
सोही आधारमा बाणगंगा नगरपालिकाले ८९.७५ प्रतिशत अंक प्राप्त गर्दै जिल्लामा उत्कृष्ट बन्न सफल भएको हो । गाउँपालिका तर्फ कपिलवस्तुको विजयनगर गाउँपालिकाले ८७.२५ प्रतिशत अंक हासिल गरी जिल्लामा पहिलो र समग्र पालिकामध्ये दोस्रो स्थान पाएको छ ।
बाणगंगाले दीर्घकालीन योजना र मध्यमकालीन खर्च संरचना अनुसार समयमा नै वार्षिक बजेट तर्जुमा, कार्यान्वयन, अनुगमन र मूल्यांकनसहित भुक्तानीको प्रक्रिया सम्पन्न गर्दै आएको छ । यसैले स्वमूल्यांकनमा उच्च अंक ल्याउन सफल भएको नगरपालिकाको दाबी छ ।
नगर प्रमुख चक्रपाणी अर्यालका अनुसार आर्थिक, सामाजिक, पूर्वाधार, वन–वातावरण तथा विपद् व्यवस्थापन र सुशासन–संस्थागत विकास जस्ता सबै क्षेत्रलाई सन्तुलित ढंगले बजेट विनियोजन गरी नतिजामुखी कार्यक्रम सञ्चालन गरेको कारण बाणगंगा जिल्लामा उत्कृष्ट बन्न सकेको हो । नगरपालिकाले पछिल्लो तीन वर्षयता पनि निरन्तर उत्कृष्ट प्रदर्शन गर्दै आएको जनाएको छ ।