बाणगंगा, ०९ भदौ ।
संघीय मामिला तथा सामान्य प्रशासन मन्त्रालयले सार्वजनिक गरेको ताजा नतिजाअनुसार कपिलवस्तु जिल्लामा बिजयनगर गाउँपालिका उत्कृष्ट बनेको छ । स्थानिय तह संस्थागत स्वमूल्याङ्कन (लिजा) अन्तर्गत बिजयनगरले ८७.२५ प्रतिशत अंक प्राप्त गर्दै जिल्लामा गाउँपालिका श्रेणीमा पहिलो र समग्रतर्फ दोस्रो स्थान हासिल गरेको हो ।
मन्त्रालयले हरेक वर्ष शासकीय प्रबन्ध, संगठन तथा प्रशासन, बजेट तथा योजना व्यवस्थापन, वित्तीय तथा आर्थिक व्यवस्थापन, सार्वजनिक सेवा प्रवाह, भौतिक पूर्वाधार, सामाजिक समावेशीकरण, वातावरण तथा विपद् व्यवस्थापन, र सहकार्य तथा समन्वय गरी नौ सूचकमा मूल्याङ्कन गर्दै आएको छ ।
यिनै सूचकहरूको मूल्याङ्कनमा बिजयनगरले आफ्नो दीर्घकालीन दृष्टिकोण, मध्यमकालीन खर्च संरचना र समयमै वार्षिक बजेट तर्जुमा, कार्यान्वयन तथा अनुगमन प्रभावकारी बनाएको कारण उत्कृष्ट स्थान हासिल गरेको हो ।
गाउँपालिकाले विकासका पाँच प्रमुख क्षेत्र—आर्थिक, सामाजिक, पूर्वाधार, वन–वातावरण तथा विपद् व्यवस्थापन, र सुशासन तथा संस्थागत विकासमा सन्तुलित बजेट विनियोजन गरी नतिजामुखी कार्यक्रम सञ्चालन गरेको जनाएको छ ।