बाणगंगा, ०९ भदौ ।
कपिलवस्तु जिल्ला बाणगंगा नगरपालिका–८ ढोडेकोल, मर्मि, भर्लावास हुँदै अर्घाखाँचीको मुसिवान जोड्ने सडकको स्तरउन्नती कार्य तत्काल अघि बढ्ने भएको छ ।
राष्ट्रिय सभा उपाध्यक्ष माननीय विमला घिमिरेको पहलमा चप्परगाउँदेखि ढोडेकोल–मर्मि–जिनुवा–भर्लावास हुँदै अर्घाखाँचीको मुसिवानसम्म जोड्ने करिब ३ करोड रुपैयाँ लागतको सडक योजना कार्यान्वयनमा ल्याउने तयारी गरिएको हो । सो क्रममा उपाध्यक्ष घिमिरे, स्थानीय पूर्वाधार विकास कार्यालय बुटवलका प्रमुख र ईन्जिनियर, वडा अध्यक्ष बाबुराम अर्याल, वडा सदस्य शैलेन्द्र बेल्वासे, समाजसेवी दुर्गाप्रसाद आचार्यलगायतले सडक खण्डको स्थलगत निरीक्षण गरेका छन् ।
निरीक्षणपछि वडा अध्यक्ष बाबुराम अर्यालले तत्काल डिपिआर (विस्तृत परियोजना प्रतिवेदन) तयार गरी काम सुरु गरिने जानकारी दिए । साथै उनले स्थानीय समस्यालाई प्राथमिकतामा राख्दै बजेट उपलब्ध गराउनुभएकोमा उपाध्यक्ष घिमिरेलाई विशेष धन्यवाद व्यक्त गरे ।
यस सडक स्तरोन्नतिपछि महेन्द्र राजमार्ग हुँदै अर्घाखाँचीको मुसिवानसम्म सहज यातायात हुने र स्थानीय बासिन्दालाई बजार तथा अन्य सेवासुविधासँग जोडिन थप सहज हुने भएकाले गाउँलेहरु उत्साहित बनेका छन् ।