कपिलवस्तु, ०९ भदौ ।
कपिलवस्तु जिल्लाको दक्षिणी क्षेत्रमा पर्ने यसोधरा गाउँपालिका वडा नम्बर ६ अन्र्तगत रंगपुर क्षेत्रमा खुलेआम तस्करी मौलाएको छ । खुला सिमाको फाइदा उठाउँदै उक्त क्षेत्रबाट दिनप्रतिदिन खाद्यबस्तु, कस्मेटिक आइटम, मेशिनरी सामग्री तथा पशुपंक्षीहरुको समेत निर्वाध रुपमा तस्करी भइरहेको हो ।
पछिल्ला दिनहरुमा प्रहरीकै संलग्नतामा तस्करीलाई प्रश्रेय दिइरहेको स्थानीय बताउँछन् । नाम नखुलाउने शर्तमा एक स्थानीयले भने, “दिनदिहाडै चामल तस्करी भइरहेको छ, रातको समयमा सयगुणा तस्करी मौलाएको छ ।” उनले प्रहरीकै सेटिङ्गमा तस्करी बढेको समेत बताए ।
अर्का स्थानीयले भने, नेपाल तर्फका गल्ला भण्डारबाट नै बिल बनाएर भारतबाट भित्रिएका अवैध चामललाई बैध बनाउने काम भइरहेको छ । बिशेष श्रोतका अनुसार, प्रहरी चौकी रंगपुरका प्रहरी नायव निरिक्षक हेमराज गिरी, जिल्ला स्थित नेपाल प्रहरी लगायतको मिलेमतोमा तस्करी कार्यले जिल्ला रंगपुर बोर्डर, पुन्निहवा, गौरा, बुलडिहवा, ठाकुरापुर, चाकरचौडा, नरकुल, हथिहवा क्षेत्रमा प्रश्रेय पाइरहेको छ ।
रंगपुर बोर्डरबाट चामल, फेन्सी, कुखुरा, मेशिनरी पार्टपुर्जा लगायतका सामग्री भित्रिने गरेका छन् । यस्तै, हथिहवा र नरकुलबाट अवैध रुपमा कुखुरा भित्रिने गरेको श्रोतले जनाएको छ । ठाकुरापुर बोर्डरबाट मुख्य रुपमा सेटिङ्गमा टायल तथा मार्वल अवैध रुपमा भित्रिने गरेको छ ।
रंगपुर क्षेत्रका चिनक गल्ला भण्डार, सर्जु गल्ला भण्डार र भारतीय पकडिहवा बजारका चुल्हई चमार लगायतका ब्यापारीले मुख्यगरि चामलको अवैध तस्कर गरिरहेको श्रोतले जनाएको छ । रंगपुर प्रहरी चौकीका प्रहरी नायव निरिक्षक हेमराज गिरीले नेपाली ब्यापारीले बेच्न ल्याएको चामल हुनसक्ने प्रतिक्रिया दिनुभएको छ । अवैध तस्करीका बारेमा आफु अनविज्ञ रहेको गिरीको भनाई छ ।
आवश्यक प्रमाण पालिका पत्रको डेक्समा शुरक्षित रहेको छ ।