बाणगंगा, ११ भदौ ।
दन्त प्रत्यारोपणजस्तो उच्चस्तरीय उपचारका लागि अब कपिलवस्तुवासीलाई बाहिरी सहर धाउनुपर्ने बाध्यता हटेको छ । बाणगंगा नगरपालिका–४ मा सञ्चालित फेमिली डेन्टल केयर सेन्टर प्रा.लि. मा दन्त प्रत्यारोपण (डेन्टल इम्प्लान्ट) सेवा सुरु भएपछि जिल्लावासीलाई ठूलो राहत पुगेको हो ।
मंगलबारदेखि सुरु भएको दन्त प्रत्यारोपण सेवामार्फत जिल्लामै पहिलोपटक सफल शल्यक्रिया सम्पन्न गरिएको छ । बाणगंगा नगरपालिका वडा न. ४ हरिहरपुरका २३ बर्षका मनिक मल्लको शल्यक्रिया गरिएको हो ।
यसअघि फेमिली डेन्टलले नियमित उपचारका साथै स्केलिङ, फिलिङ, रुट क्यानाल, ब्रेसेस, प्रोस्थोडोन्टिक सेवा लगायतका उपचारहरू प्रदान गर्दै आएको थियो ।
शल्यक्रियाबारे जानकारी दिँदै केन्द्रका सञ्चालक तथा वरिष्ठ हाइजिनिस्ट कृष्ण पोख्रेलले भने, “अब उच्चस्तरीय दन्त उपचारका लागि बुटवल वा राजधानी धाउनुपर्ने अवस्था छैन । स्थानमै सहज र गुणस्तरीय सेवा पाउने वातावरण बनाएका छौँ ।”
त्यसैगरी शल्यक्रिया सफलतापूर्वक सम्पन्न गरेका दन्त चिकित्सक डा. सम्राट पराईले भने, “कपिलवस्तु जिल्लामा दन्त प्रत्यारोपण सम्भव छ भन्ने विश्वास जगाउन यो पहिलो कदम हो । यो सुविधा विस्तारसँगै आम नागरिकलाई दीर्घकालीन रूपमा फाइदा पुग्नेछ ।”
फेमिली डेन्टलमा दैनिक रूपमा लुम्बिनी प्रादेशिक अस्पताल बुटवल तथा भैरहवा मेडिकल कलेजका दन्त चिकित्सकहरूले पनि सेवा प्रदान गर्दै आएका छन् । कपिलवस्तुको बाणगंगामा स्थापना भए तापनि अर्घाखाँची, रुपन्देही, दाङ, प्युठानलगायतका छिमेकी जिल्लाबाट समेत बिरामी उपचारका लागि आउने गरेका छन् ।