बाणगंगा, १२ भदौ । कपिलवस्तु नगरपालिका–१० अन्तर्गत तौलिहवा–जितपुर सडकखण्डको पचेहरा हाटबजार क्षेत्रमा बिहीवार साँझ बम विस्फोट भएको छ । स्थानीयवासीले करिब ६ः१५ बजे ठूलो आवाजसहित विस्फोट भएको जानकारी दिएका छन् ।
जिल्ला प्रहरी कार्यालय कपिलवस्तुका प्रहरी नायब उपरीक्षक (डीएसपी) रिपेन्द्रकुमार सिंहका अनुसार विस्फोट भएको जानकारी पाएलगत्तै प्रहरी टोली घटनास्थल पुगेको हो । उनले भने, “पड्किएको आवाज आएको छ, सडकमा खाल्डो देखिएको छ तर यो बम हो वा अरू कुनै विस्फोटक हो भन्ने यकिन हुन बाँकी छ ।”
विस्फोटका कारण सडकको भागमा हल्का क्षति भएको र सामान्य खाल्डो परेको प्रारम्भिक जानकारी आएको छ । हालसम्म जनधनको क्षति नभएको प्रहरीको भनाइ छ । घटनास्थल वरिपरि प्रहरीले सुरक्षा घेरा हाल्दै अनुसन्धान अघि बढाइरहेको छ ।
स्थानीयवासीहरू भने विस्फोटपछि त्रसित भएका छन् । हाटबजार क्षेत्रमा विस्फोट भएपछि व्यापार तथा आवतजावत प्रभावित भएको छ । विस्फोट कसरी भयो भन्नेबारे यकिन जानकारी प्राप्त नभएको प्रहरीले जनाएको छ । घटनाबारे थप विवरण आउन बाँकी छ ।