कपिलवस्तु, १५ भदौ ।
कपिलवस्तु नगरपालिका–१०, पचेहरामा रहेको यसोधरा सामुदायिक वनको करिब दुई विघा (कच्ची) जग्गा पूर्व अध्यक्ष दिनानाथ निषादले अतिक्रमण गरेको खुलासा भएको छ । वन संरक्षणका जिम्मेवार पदमा रहेर आठ वर्षसम्म अध्यक्ष बनेका निषादले व्यक्तिगत स्वार्थमा जग्गा प्रयोग गर्दै गोठ र खेती गरिरहेको स्थानीयले बताएका छन् ।
वन संरक्षण र विकासका लागि नीतिगत काम गर्नुपर्ने जिम्मेवारी भएको व्यक्तिबाटै अतिक्रमण हुँदा स्थानीय समुदायले आक्रोश व्यक्त गरेका छन् । “पूर्व अध्यक्षकै संलग्नता देखिएपछि समस्या जटिल बन्दै गएको छ,” एक उपभोक्ताले भने ।
हालका अध्यक्ष धर्मेन्द्र यादवले निवर्तमान अध्यक्ष निषादले कार्यकालकै समयमा पटक–पटक विवाद सिर्जना गरेको आरोप लगाए । उनले वन नियमावली उल्लंघन गर्दै काठ कटान, मुछान र ग्रेडिङमा समेत अवरोध गर्ने, पदाधिकारी तथा कर्मचारीमाथि हातपात गर्न खोज्ने काम गरेको बताए ।
यस्तै, पूर्व अध्यक्ष इन्द्रदेव केवटले सामुदायिक वनकै नाममा जगदिशपुर ताल कृषि सहकारीबाट लिएको २० हजार रुपैयाँ अहिले ब्याजसहित ४८ हजार पुगेको जानकारी पनि आएको छ । इन्द्रदेव केवट र निषाद बाबु–छोरा हुन् ।
डिभिजन वन कार्यालय पटनाका प्रमुख सन्दीप बासुकलाले अतिक्रमणमा भएको सिमलको काठ कटान संग्लग्न भएपछि निषादलाई यसअघि नै ७४ हजार रुपैयाँ जरिवाना तोकिएको जानकारी दिए । साथै, कर्मचारीमाथि पटक–पटक दुर्व्यवहार र हातपातको प्रयास भएको भन्दै वन अधिकृत मदन ढुङ्गानाको अध्यक्षतामा छानबिन समिति गठन गरिएको बताए ।यता, निषादसँग सम्पर्क प्रयास गर्दा मोबाइल फोन उठेन ।
