कोपवा । आरम्भ चौतारी लघुवित्त वित्तीय संस्था लिमिटेड, शाखा कार्यालय कोपवाको आयोजनामा आज बाणगंगा नगरपालिका वडा नं। ५ को कार्यालय परिसर कोपवमा एकदिने वित्तीय साक्षरता कार्यक्रम सम्पन्न गरेको छ ।
कार्यक्रमका प्रमुख अतिथि लुम्बिनी प्रदेश सांसद विष्णुले ऋण लिएपछि अनिवार्य तिर्नुपर्ने विषयमा जोड दिँदै केही घटनाका कारणले गर्दा ऋणको सही उपयोगमा समस्या र निगरानी गर्नुपर्ने आवश्यकता औलाए । पन्थीले फजुल खर्च नगर्न र बचत गर्ने बानीको विकास गर्न सहभागीहरूलाई आग्रह गरे । पन्थीले पैसालाई बाक्सामा वा खल्तीमा मात्र राख्न नहुने यसलाई चलायमान बनाउने वा उपयोग गर्नुपर्ने उद्यम व्यवसाय गर्नेहरूले नै ऋण लिन्छन् यस्तै प्रक्रियाबाट अर्थतन्त्र चलायमान हुने बताए ।
बाणगंगाकी उप मेयर रिता चौधरीले ऋणको सही सदुपयोग नभएमा व्यक्ति तथा संस्था दुवैलाई अप्ठ्यारो पर्ने बताइन । उनले केही सहकारीका कारणले गर्दा लघुवित्त क्षेत्र नै बदनामी भएको उल्लेख गर्दै आरम्भ चौतारी लघुवित्तले विगत ८–९ वर्षदेखि राम्रो काम गर्दै आएकोमा प्रशंसा गरिन ।
वडा नं ५ का वडा अध्यक्ष दुनिका भुसालले संस्थाले ऋणलाई कसरी परिचालन गर्ने र बचतलाई कसरी उपयोग गर्ने भन्ने विषयमा संस्थाको ध्यान केन्द्रित हुनुपर्नेमा जोड दिए । वित्तीय साक्षरता कार्यक्रमका क्रममा उत्कृष्ट बचत, ऋण परिचालन र अनुशासन कायम गर्ने शकुन्तला थारु, देवा खनाल, अमृता थारु, शिव अधिकारी, चिन्की थारु, दिपा थारुलाई सम्मनित गरिएको थियो ।
कार्यक्रममा प्रमुख अतिथि लगायत अन्य अतिथिहरूलाई मायाको चिनो प्रदान गरिएको थियो। संस्थाका शाखा प्रमुख माधव प्रसाद पन्थीको अध्यक्षतामा सम्पन्न उक्त कार्यक्रममा नरसिंह मिश्र ले स्वागत मन्तव्य राखेका थिए भने कार्यक्रमको उद्देश्यमाथि प्रतिक्षा परियार ले प्रकाश पारेकी थिइन । अनुगमन अधिकृत दिपा ज्ञवाली ले संचालन गरेको कार्यक्रममा नेपाल पत्रकार महासंघ कपिलवस्तु शाखाका सहसचिव कृष्ण प्रसाद पौडेल, पत्रकार हरि अधिकारी लगायत १०५ जनाको सहभागिता रहेको थियो ।