कपिलवस्तु, २९ चैत्र ।
चिल्ड्रेन्ज प्याराडाईस इङ्गलिश बोर्डिङ हाई स्कुलको २८औँ वार्षिकोत्सव, अभिभावक दिवस तथा नतिजा प्रकाशन कार्यक्रम भव्य रूपमा सम्पन्न भएको छ।
कार्यक्रमका प्रमुख अतिथि मोतिलाल भट्टराईले शिक्षाको गुणस्तर नै विद्यालयको पहिचान र विकासको आधार हुने उल्लेख गर्दै गुणस्तरीय शिक्षा प्रदान गर्न सके विद्यार्थी संख्या स्वतः वृद्धि हुने धारणा व्यक्त गर्नुभयो। उहाँले विद्यार्थीलाई केवल सैद्धान्तिक ज्ञानमा सीमित नराखी व्यवहारिक र सीपमूलक शिक्षामा जोड दिन विद्यालय प्रशासनलाई सुझाव दिनुभयो।
त्यस्तै, कार्यक्रममा बोल्दै विद्यालयका प्रधानाध्यापक माधव बेल्वासेले विद्यालयको वार्षिक प्रगति प्रतिवेदन तथा आगामी कार्ययोजना प्रस्तुत गर्नुभयो। उहाँले विद्यालयले शैक्षिक गुणस्तर अभिवृद्धि, अतिरिक्त क्रियाकलापको प्रवर्द्धन तथा अनुशासनयुक्त वातावरण निर्माणमा निरन्तर काम गरिरहेको जानकारी दिनुभयो। आगामी दिनमा प्रविधिमैत्री शिक्षण पद्धति अवलम्बन गर्दै विद्यार्थीको समग्र विकासमा जोड दिइने पनि उहाँले बताउनुभयो।
प्रधानाध्यापक बेल्वासेले विद्यालयको उन्नति र सफलतामा अभिभावकहरूको साथ र सहयोग अत्यन्त महत्वपूर्ण रहेको उल्लेख गर्दै सम्पूर्ण अभिभावकप्रति आभार व्यक्त गर्नुभयो। उहाँले विद्यालय र अभिभावकबीचको सहकार्य अझ सुदृढ बनाउँदै लैजानुपर्ने आवश्यकता औंल्याउनुभयो।
कार्यक्रममा चालु शैक्षिक सत्रको नतिजा सार्वजनिक गरिएको थियो। विभिन्न तह र कक्षाका विद्यार्थीहरूको नतिजालाई श्रेणीअनुसार वर्गीकरण गरी उत्कृष्ट नतिजा ल्याउने विद्यार्थीहरूलाई पुरस्कार, प्रमाणपत्र तथा सम्मान प्रदान गरिएको थियो। यसले विद्यार्थीहरूमा प्रतिस्पर्धात्मक भावना र अध्ययनप्रतिको उत्साह अभिवृद्धि गर्ने विश्वास लिइएको छ।
यसैबीच, विद्यार्थीहरूले विविध सांस्कृतिक कार्यक्रममार्फत आफ्नो प्रतिभा प्रस्तुत गरेका थिए । नृत्य, गीत, नाटक तथा अन्य सिर्जनात्मक प्रस्तुतिहरूले कार्यक्रममा आकर्षण थपेको थियो। साथै, खेलकुदतर्फ उत्कृष्ट प्रदर्शन गर्ने विद्यार्थीहरूलाई समेत सम्मान गरिएको थियो।
विद्यालय व्यवस्थापन समितिका अध्यक्ष रम प्रसाद पौडेलको अध्यक्षता, मोतिलाल भट्टराईको प्रमुख आतिथ्यता तथा बाणगंगा नगरपालिका–८ का वडा अध्यक्ष बाबुराम अर्यालको विशिष्ट आतिथ्यता रहेको थियो।
कार्यक्रममा विद्यार्थी, अभिभावक, शिक्षक, पत्रकार तथा स्थानीय बुद्धिजीवीहरूको उल्लेखनीय उपस्थिति रहेको थियो। सहभागीहरूले विद्यालयले आयोजना गरेको कार्यक्रमलाई व्यवस्थित, प्रभावकारी र प्रेरणादायी रहेको प्रतिक्रिया दिएका थिए।
विद्यालयले आगामी दिनमा पनि शैक्षिक उत्कृष्टता हासिल गर्दै विद्यार्थीको सर्वाङ्गीण विकासमा निरन्तर अग्रसर रहने प्रतिबद्धता व्यक्त गरेको छ।