पुष ४ । अक्षत बहुउद्देश्यीय सहकारी संस्था लिमिटेडको दोस्रो वार्षिक साधारण सभा सम्पन्न भएको छ । कपिलवस्तु नगरपालिका वडा नम्बर ९, कुस्मामै युवाहरुको सक्रियतामा स्थापित उक्त सहकारीले आफ्नो दोस्रो साधारण सभा सम्पन्न गरेको हो ।
साधारण सभामा सञ्चालक समितिको तर्फबाट अध्यक्ष दिपक पौडेलले जिल्लाकै उत्कृष्ट सहकारी बनाउने योजनाका साथ अगाडी बढिएको बताए । शेयर सदस्यको विश्वासलाई आत्मसाथ गर्दै सहकारीलाई पारदर्शी रुपमा लगिएको उनले जानकारी दिए । अध्यक्ष पौडेलले आर्थिक वर्ष २०८०/८१ को वार्षिक प्रतिवेदन र सहकारीको भावि कार्यक्रम तथा योजना समेत प्रस्तुत गरेका थिए ।
लेखा समिती संयोजक हरी प्रसाद खनालले आर्थिक प्रतिवेदन प्रस्तुत गर्दै आर्थिक वर्ष २०८०/८१ मा सेयर सदस्य ९७ जना, सेयर पुँजी १६ लाख ३० हजार ६ सय, बचत २२ लाख ६० हजार २ सय ५३ रुपैया, लगानी ३२ लाख ७३ हजार रुपैयाँ रहेको बताए ।
ऋण उपसमितिका पूर्ण प्रसाद शर्मा पौडेलले ऋण उपसमितीको प्रतिवेदन प्रस्तुत गरेका थिए । यस्तै, दिवराज शर्माले संस्थाको सुझाव तथा मार्गनिर्देशन प्रतिवेदन प्रस्तुत गरेका थिए ।
सहकारीले हाल जिल्लाका तीन पालिकामा आफ्नो कार्यक्षेत्र सहित अघि बढिएको ब्यवस्थापक तारा खरेलले बताइन् ।कपिलवस्तु, बाणगंगा र बुद्धभूमि नगरपालिका गरि तीन पालिकामा सेवा क्षेत्र बिस्तार गर्दै सहकारीले कामकारवाही गरिरहेको उनले बताइन् । बि.सं. २०७९ श्रावण ९ गते स्थापना भएको सहकारीमा हालसम्म ९७ जना शेयर सदस्य रहेका छन् ।
यसैगरि, सहकारीले आफ्नै लगानीमा अक्षत करेशाबारीको समेत उद्घाटन गरेको छ । जेष्ठनागरिक रोम बहादुर भट्टराईको प्रमुख आतिथ्यता रहेको कार्यक्रममा पूर्व वडासदस्य खगेश्वर उपाध्याय, कुस्मा माध्यमिक बिद्यालय ब्यवस्थापन समितीका अध्यक्ष रिसवदेव पौडेल, मुक्तिनाथ पौडेल, गोविन्द न्यौपाने लगायतको आतिथ्यता रहेको थियो भने शेयर सदस्यहरूको समेत सक्रिय सहभागिता रहेको थियो । कार्यक्रममा बोल्दै वक्ताहरूले संस्थाको उत्तरोत्तर प्रगतिको कामना गर्दै स्थानीय स्तरमा यस सहकारीले पुर्याएको योगदानको चर्चा गरेका थिए ।
संस्थाका सचिव शेखर शर्माको स्वागत मन्तब्य रहेको कार्यक्रमको संचालन संस्थाका ब्यवस्थापक तारा खरेलले गरेकी थिइन् ।