कपिलवस्तुको कृष्णनगर नगरपालिका अब “पूर्णखोप सुनिश्चित नगरपालिका” बनेको छ। नियमित खोप कार्यक्रमअन्तर्गत सबै लक्षित बालबालिकाले आवश्यक खोप सेवा प्राप्त गरेपछि सोमबार एक विशेष समारोहका बीच नगरपालिका सभाहलमा औपचारिक घोषणा गरिएको हो।
समारोहका प्रमुख अतिथि जिल्ला समन्वय समिति कपिलवस्तुका प्रमुख बाबुराम आचार्यले घोषणा पत्र सार्वजनिक गर्दै कृष्णनगरलाई पूर्णखोप नगरपालिका घोषणा गर्नुभयो। उहाँले जानकारी दिनुभयो कि कपिलवस्तु जिल्लाका १० मध्ये ८ स्थानीय तहमा यो कार्यक्रम लागू भइसकेको छ भने बाँकी दुई पालिकामा पनि चाँडै कार्यान्वयन गरिनेछ।
नगरप्रमुख रजत प्रताप शाहले कार्यक्रममा खोप अभियान सफल बनाउन अहोरात्र खटिने स्वास्थ्यकर्मी, महिला स्वास्थ्य स्वयंसेविका, अभिभावक र समुदायका अगुवाहरूको योगदानप्रति आभार व्यक्त गर्नुभयो। उहाँले भन्नुभयो, “स्वास्थ्यकर्मीहरूले आफ्नो जिम्मेवारी समर्पणपूर्वक निर्वाह गरेकाले आजको उपलब्धि सम्भव भएको हो।”
उक्त अवसरमा खोप अभियानमा उल्लेखनीय योगदान पुर्याउने विभिन्न स्वास्थ्य संस्थाका प्रमुख, स्वयंसेविका, स्वास्थ्यकर्मी र समुदायका प्रतिनिधिहरूलाई प्रमाणपत्र र दोसल्ला ओढाएर सम्मान गरियो। वक्ताहरूले उनीहरूको निष्ठा र समर्पण नै अभियान सफलताको मुख्य आधार भएको बताएका थिए।
कार्यक्रममा जिल्ला समन्वय समितिका उपप्रमुख रमेश चौधरी, नगर उपप्रमुख आरती देवी चौधरी, जिल्ला स्वास्थ्य कार्यालयका प्रमुख प्रतिनिधि मधुकर श्रेष्ठ, सबै वडाध्यक्षहरू, स्थानीय समाजसेवी, पत्रकार, शिक्षक र अभिभावकहरूको उल्लेखनीय उपस्थिति रहेको थियो।
कृष्णनगरको पूर्णखोप घोषणा स्वास्थ्य सेवा पहुँचमा सुधार, जनचेतनाको वृद्धिसँगै सुरक्षित र उज्ज्वल बाल भविष्य निर्माणतर्फको महत्वपूर्ण पाइला भएको नगरपालिकाले जनाएको छ।