बाणगंगा, ३० जेठ ।
बाणगंगा नगरपालिकाले आगामी आर्थिक वर्षका लागि नीति तथा कार्यक्रम र बजेट सम्बन्धी महत्वपूर्ण निर्णयहरू गरेको छ। विहिबार नगरपालिकाको सभाहलमा भएको नगरपालिकाको कार्यपालिका बैठकले बिभिन्न महत्वपूर्ण निर्णयहरू गरेको हो ।
नगरप्रवक्ता विष्णु प्रसाद पौडेलका अनुसार, बैठकले अघिल्लो निर्णयहरूको समीक्षा गर्दै ती निर्णयहरू सन्तोषजनक र प्रभावकारी रूपमा कार्यान्वयन भएको निष्कर्ष निकालेको छ। साथै, बैठकले आर्थिक वर्ष २०८२/०८३ का लागि नीति तथा कार्यक्रम आगामी असार ५ गते नगरसभा समक्ष प्रस्तुत गर्ने निर्णय गरेको छ। सो अवसरमा विषयगत समितिका प्रतिवेदनहरू पनि पेस गरिनेछ।
प्रवक्ता पौडेलले बैठकले असार १० गते बजेट प्रस्तुत गर्ने निर्णय समेत गरेको जानकारी दिनुभयो । यी दुवै कार्यक्रम बाणगंगा नगरपालिकाको सभाहलमा बिहान ११ बजे हुनेछन् ।
नगरप्रमुख चक्रपाणी अर्यालले नीति तथा कार्यक्रम र बजेटका विषयमा राजनीतिक दल, संघसंस्था, सञ्चार क्षेत्र, नगरवासी तथा सरोकारवालासँग अन्तरक्रिया गरी आवश्यक सल्लाह सुझाव संकलन गरिने बताउनुभयो । उहाँले नगरको गौरवका आयोजना निरन्तरता दिँदै पूर्वाधार निर्माण, शिक्षा, स्वास्थ्य, कृषि र पर्यटनलाई प्राथमिकता दिइने जानकारी दिनुभयो ।
नगर उपप्रमुख रिता कुमारी चौधरीले यो वर्षको नीति तथा कार्यक्रम र बजेट कार्यान्वयनमुखी हुने बताउँदै, अब सामाजिक विकासलाई प्राथमिकतामा राखेर योजना तय गरिने बताउनुभयो ।