बाणगंगा, १३ मंसिर ।
बाणगंगा नगरपालिका–८, मधुवनधाममा मङ्सिर ११ देखि १८ गतेसम्म सञ्चालन हुने “श्रीमद्भागवत धनधान्याचल ज्ञान महायज्ञ एवं भागीरथी गौ–संरक्षण महोत्सव” का लागि बाणगंगा–४, गजेहडा निवासी वरिष्ठ समाजसेवी कृष्ण बहादुर कुँवरले उल्लेख्य सहयोग प्रदान गरेका छन् ।
महायज्ञ मूल समारोह समितिका अनुसार कुँवरले महोत्सवको सफल सञ्चालन र गौ–संरक्षण अभियानलाई सघाउन रु ५०५,५५५ (अक्षरेपी पाँच लाख पाँच हजार पाँच सय पचपन्न रुपैयाँ) सेवादान प्रदान गरेका हुन्। समाजसेवी कुँवरले निरन्तर समाज, धार्मिक तथा सांस्कृतिक कार्यक्रममा सक्रिय भूमिका निभाउँदै आएका छन्।
समितिले कुँवरको सहयोगलाई गौ–संरक्षणका लागि उदाहरणीय योगदान बताउँदै हार्दिक आभार, कृतज्ञता तथा सम्मान व्यक्त गरेको छ। दातृ परिवारमा ईश्वरको अनुकम्पा, कुल–पितृको अक्षय आशीष र सर्वतोमुखी प्रगति रहोस् भन्ने शुभकामना समेत व्यक्त गरिएको छ। आगामी मङ्सिर ११ देखि १८ सम्म सञ्चालन हुने यो महायज्ञमा धार्मिक प्रवचन, सांस्कृतिक कार्यक्रम तथा गौ–संरक्षणसम्बन्धी जनचेतनामूलक गतिविधि सञ्चालन हुने बताइएको छ।