पिपरा । कपिलवस्तुको पिपरास्थित जनता माध्यमिक विद्यालयले यस वर्षको ‘जनता स्किल डे’लाई विशेष बनाएको छ। शुक्रबार सञ्चालन हुने नियमित अतिरिक्त क्रियाकलापलाई विद्यालयले फरक ढंगबाट प्रस्तुत गर्दै विद्यार्थीलाई परम्परागत सिपदेखि सिर्जनात्मक सीपसम्मको सीधा अनुभव दिने उद्देश्यले विविध कार्यक्रमहरू सञ्चालन गरेको हो।
कार्यक्रमका संयोजक विक्रम बेल्बासेका अनुसार विद्यार्थीको लुकेर बसेका क्षमता उजागर गर्न र सिकाइलाई व्यवहारसँग जोड्न विद्यालयले विभिन्न प्रायोगिक क्रियाकलाप समावेश गरेको छ। “दैनिक जीवनमा प्रयोग हुने परम्परागत सिप क्रमशः हराउँदै गइरहेका बेला विद्यार्थीलाई त्यसतर्फ आकर्षित गर्न हामीले दुना–टपरी बनाउने, परालको गुन्द्रि र पिर्का तयार गर्ने, खरको डोरी (तोरन) बनाउने जस्ता गतिविधि समावेश गरेका छौँ,” बेल्बासेले बताए।
त्यसैगरी उनीको धागोबाट टोपी तथा मोजा बुनाइ, कागजका फुल बनाउने, माटोका भाँडा तयार गर्ने, सिलाइ–कटाइ र ज्योतिष परामर्शजस्ता व्यावहारिक सिपसम्बन्धी कक्षा पनि सञ्चालन गरिएको हो । कक्षाभित्र सीमित नभई विद्यार्थीलाई बाह्य अध्ययनमा जोड्ने उद्देश्यले जंगल सफारी तथा ऐतिहासिक स्थल तिलौराकोटस्थित बुद्धदरबार अवलोकनका कार्यक्रमहरू समेत आयोजना गरिएको विद्यालयले जनाएको छ।
विद्यालयका प्रधानाध्यापक रमेश पन्थीले, सामुदायिक विद्यालयहरू परिवर्तनशील बन्न सक्दैनन् भन्ने धारणा तोड्दै जनता माविले निरन्तर नवीन अभ्यास गर्दै आएको बताए । “विद्यार्थी आधुनिक प्रविधितर्फ मात्र आकृष्ट भइरहेका बेला परम्परागत सिप सिकाइलाई पुनर्जीवन दिन हामीले यस्ता कार्यक्रमलाई नियमितता दिएका छौँ,” पन्थीले भने। उनका अनुसार अतिरिक्त गतिविधिले विद्यार्थीको शारीरिक, मानसिक र सामाजिक विकासमा महत्वपूर्ण भूमिका खेल्ने भएकाले विद्यालयले यसलाई आफ्नो प्रमुख शैक्षिक आधारका रूपमा लिएको छ।
स्किल डेमा विद्यार्थीहरूको उल्लेखनीय सहभागिताले विद्यालयको प्रयास सफल भएको पन्थीले बताए। विद्यार्थीहरूले सिर्जनशीलता, आत्मविश्वास र व्यवहारिक ज्ञान एकसाथ अनुभव गरेका कारण उनीहरूका सीप र अभिव्यक्ति क्षमतामा प्रत्यक्ष प्रभाव परेको विद्यालयको मूल्यांकन छ।
परम्परा र आधुनिकताको सुन्दर संगम बनेको ‘जनता स्किल डे’ले समुदायमै सकारात्मक सन्देश पुगेको छ ।