कपिलवस्तु, असोज १७ । कपिलवस्तुको बाणगंगामा एकै घरका दुई दिदीबहिनी (बालिका) लाई सर्पले डस्दा एकको मृत्यु भएको छ भने एक जनाको अवस्था गम्भिर रहेको छ । बाणगंगा नगरपालिका वडा नम्बर ९ भलवाड जिनुवा स्थित मोतिलाल क्षेत्रीका छोरीहरु ३ वर्षीय रितिका क्षेत्री र ८ वर्षिय इशिका क्षेत्रीलाई मंगलबार राति सर्पले डसेको हो ।
मंगलबार राति घरमा सुतिरहेको अवस्थामा सर्पले डसेको बताइएको छ । सर्पले डसेको थाहा पाएलगत्तै बिहान ४ बजे गोरुसिँगे स्थित सर्पदशं उपचार केन्द्रमा लगिएकामा थप उपचारका लागि लुम्बिनी प्रादेशिक अस्पताल बुटवल लगिएको थियो । उपचारका क्रममा ३ वर्षीय बालिका रितिकाको मृत्यु भएको लुम्बिनी प्रादेशिक अस्पताल बुटवलका सूचना अधिकारी डा.नेत्र बहादुर रानाले जानकारी दिनुभयो ।
उहाँले ‘उपचारकै क्रममा दुई दिदीबहिनी मध्ये एकको मृत्यु भएको छ, एक जनाको अवस्था पनि गम्भिर छ । हामी उपचार गर्दै छौँ ।’ आठ वर्षीय इशिकाको भेण्टीलेटरमा राखेर उपचार भइरहेको डा। रानाले बताउनुभयो । उनको पनि अवस्था गम्भिर रहेको छ ।
घरमा सुतिरहेका बेला राति करिब १२ बजेको समयमा उनीहरुलाई सर्पले डसेको अनुमान गरिएको स्थानीयले बताएका छन् । झुल लगाएर सुतेका एकै घरका दुई बहिनीलाई सर्पले डसेको हो ।
परिवारले ३ वर्षिय रितिकालाई सर्पले टोकेको आशंका गरि सर्पदशं अस्पताल गोरुसिँगेमा पुर्याएकामा उनलाई थप उपचारका लागि बुटवल रेफर गरिएको सर्पदशं अस्पतलाका डा. नबिन भण्डारीले बताउनुभयो । त्यस पश्चाल तीन वर्षीय बालिकालाई पनि आशंका मानि उपचारका लागि सँगै अस्पताल लगिएको बताइएको छ । एक जनाको कान र एकजनाको हातमा सर्पले डसेको बताइएको छ ।