बाणगङ्गा, ०४ चैत्र । भूमि समस्या समाधान आयोग जिल्ला समिति कपिलवस्तुले भूमिहीन दलित, भूमिहीन सुकुम्बासी र अव्यवस्थित बसोवासीको लागि जग्गा नापजाँच प्रक्रिया सुरु गरेको छ । आयोगको आयोजनामा र बाणगङ्गा नगरपालिका अन्तर्गतको भूमि इकाइको सह आयोजनामा नापजाँचको कार्य बाणगङ्गा नगरपालिका वडा नं. ७ बाट औपचारिक रूपमा सुरु गरिएको हो ।
कार्यक्रमको उद्घाटन लुम्बिनी प्रदेश सभा सदस्य गिरधारीलाल न्यौपानेले नापजाँच मेसिनको स्विच अन गरेर गर्नुभएको हो । प्रमुख अतिथि न्यौपानेले कांग्रेस–एमालेको गठबन्धन सरकारले जनताको चाहनाअनुसार काम गरिरहेको उल्लेख गर्दै, कुनै पनि दलगत पूर्वाग्रह नराखी वास्तविक पात्रलाई भूमिपति बनाउने सरकारको प्रतिबद्धता दोहोर्याउनुभयो । विगतमा अन्य सरकारहरूबाट यो काम सम्पन्न हुन नसकेको बताउँदै, अहिलेको सरकारले योजनाबद्धरूपमा जनताको आकाङ्क्षा पूरा गर्न नापजाँच सुरु गरेको उहाँको भनाइ छ ।
आयोगका कपिलवस्तु अध्यक्ष झबिलाल पोख्रेलले नापजाँचका मापदण्ड तथा सीमा स्पष्ट पार्दै लाभग्राहीबीच आपसी विवाद नगरी प्रक्रिया सहज बनाउन आग्रह गर्नुभयो । साथै, जनप्रतिनिधिबाट सिफारिस रोकिएमा आयोगमा जानकारी दिनसमेत अनुरोध गर्नुभयो । उहाँले आयोगले कुनै राजनीतिक प्रतिशोध नराखी निष्पक्ष काम गर्ने प्रतिबद्धता जनाउनुभयो ।
बाणगङ्गा नगरपालिकाका प्रमुख चक्रपाणि अर्यालले नगरवासीहरू लालपुर्जा पाउने प्रतीक्षामा रहेको बताउँदै सम्पूर्ण वडाध्यक्षहरूलाई सहजिकरणका लागि आग्रह गर्नुभयो। कपिलवस्तु जिल्लामै पहिलोपटक बाणगङ्गाबाट नापजाँच सुरु गरिएकोमा आयोगप्रति आभार व्यक्त गर्दै बाणगङ्गा नगरपालिका हरेक क्षेत्रमा अगाडि रहेको धारणा व्यक्त गर्नुभयो ।
कार्यक्रममा प्रमुख प्रशासकीय अधिकृत भक्तिराम मरासिनी, नेपाली काङ्ग्रेसका प्रतिनिधि छविलाल नेपाली, रास्वपाका पदम रेग्मीलगायतले शुभकामना मन्तव्य राख्नुभएको थियो ।
वडा नं. ७ का वडाध्यक्ष विष्णु गिरीको स्वागत मन्तव्य र बाणगङ्गा नगरपालिकाका शिक्षा, युवा तथा खेलकुद शाखाका प्रमुख खिम बहादुर जिसीको सञ्चालनमा सम्पन्न कार्यक्रममा आयोगका पूर्वअध्यक्ष डम्मर शर्मा, नापी कार्यालयका प्रमुख जनकबहादुर भण्डारी, उपप्रमुख रिता कुमारी चौधरी, नगर प्रवक्ता विष्णु प्रसाद पौडेल, आयोगका सदस्य तथा कर्मचारी लगायत सयौँको उपस्थिति रहेको थियो ।