चैत्र २३ । कपिलवस्तुका शुद्धोधन र यसोधरा गाउँपालिकाले गहुँको छ्वालीमा आगो लगाउने कार्यमा प्रतिबन्ध लगाएका छन् । पालिकाहरुले गहुँ, लगायतका फसल तयार भई भित्र्याउने समय भएको अवस्थामा केही किसानहरूले मेसिनको सहयोगमा आफ्नो फसल भित्र्याई बाँकी रहेको छ्वाली, पराल, भुस खेतमै आगो लगाउने कार्य भएकोले गाउँपालिकाहरुले त्यस्तो कार्य नगर्न आग्रह गरेका हुन् ।
गहुँको छ्वाली खेतमै आगो लगाउने कार्यले पर्यावरणीय दृष्टिले महत्त्वपूर्ण जिवजन्तुको विनाश हुने, खेतको उर्वराशक्तिमा कमि आउने लगायत घरपालुवा जिवजन्तुको खाद्यान्नमा समेत कमि आउने शुद्धोधन गाउँपालिका अध्यक्ष कमलेश शरण चौधरीले बताए ।
छ्वाली (भुसा) मा आगो लगाएर नष्ट गर्नुको सट्टा बहुउपयोगको रुपमा घरपालुवा जन्तुको खाद्यान्नको रुपमा वा कम्पोष्ट मल बनाई प्रयोगमा ल्याउन पालिका बासिलाई अनुरोध गरिएको उपाध्यक्ष होमप्रकाश चौधरीले जनाए ।
त्यस्तै गाउँपालिका उपाध्यक्ष चौधरीद्वारा हस्ताक्षरित एक सूचनामा गहुँको छ्वालीमा आगो लगाउने तथा मनोमानी गर्ने र सूचनालाई वेवास्ता गरी उल्लेखित गतिविधि भएमा वा सो कार्यबाट कुनै दुर्घटना या क्षति भएमा किसान स्वयम् जवाफदेही हुनुपर्ने एवम् दोषिउपर नियमानुसार कार्वाही हुने उल्लेख छ ।
यस्तै, गर्मी मौसम सुरु भए सँगै यशोधरा गाउँपालिकामा आगलागिको उच्च सम्भावना बढी रहेको भन्दै आगलागीको जोखिम न्यूनीकरणका लागि उच्च सतर्कता अपनाउन आग्रह गरेकाे छ । गहुँ बाली भित्रयाउने कार्य भई रहेको सन्दर्भमा कृषकहरुले गहुँ बाली काटी सकेपछी गहुँको छ्वाली (भुसा)मा आगो लगाउने प्रवृतिले गर्दा माटोमा रहेका मित्र परजीवीहरु नष्ट हुने, वातावरणमा नकारात्मक असर पर्ने, गाईवस्तुलाई आवश्यक पर्ने भुसा नष्ट हुने, आगलागिको उच्च जोखिम हुने र धनजनको समेत क्षति हुने भएकोले गहुँको छ्वालीमा आगो लगाउने कार्य नियन्त्रण गर्न सम्बन्धित सबैलाई अनुरोध गरिएको गाउँपालिकाका सामाजिक बिकास अधिकृत कृष्णनाथ पाण्डेयले जनाए ।
यस्तै यसोधराले आगलागि नियन्त्रण र रोकथाम सम्बन्धि सचेतना फैलाउन सबै वडा कार्यालय, जनप्रतिनिधी, कर्मचारी, शिक्षक, सुरक्षाकर्मी र संघ संस्थाले समुदायस्तरमा प्रचार प्रसार गर्ने र गराउने कार्य गरिने पाण्डेयले बताए ।
कृषकहरुलाई खेतको छ्वाली (भुसा)मा आगो लगाउने कार्य नगर्न नगराउनु हुन अनुरोध गरिएको गाउँपालिका अध्यक्ष शिव दयाल तिवारीले जनाएका छन् ।