कपिलवस्तु, १४ फागुन २०८२
प्रतिनिधिसभा निर्वाचन नजिकिँदै गर्दा कपिलवस्तु क्षेत्र नम्बर १ मा चुनावी बहसको स्वरूप फरक देखिएको छ। देशका अन्य क्षेत्रमा दलगत संगठनको बलियो उपस्थिति देखिँदा यहाँ भने व्यक्तित्वको प्रभावले चर्चा पाएको छ। यही परिवेशमा नेपाल कम्युनिष्ट पार्टी (नेकपा) का उम्मेदवार कृष्णबहादुर कुँवर केन्द्रमा उभिएका छन्।
कुँवरलाई उनका समर्थकहरूले लामो समयदेखि सामाजिक क्षेत्रमा सक्रिय, स्थानीय मुद्दामा जानकार र सहज पहुँच भएका उम्मेदवारका रूपमा चित्रण गर्दै आएका छन्। गाउँ–टोलका कार्यक्रममा सक्रिय सहभागिता र समुदायसँग प्रत्यक्ष संवाद उनको चुनावी रणनीतिको मुख्य आधार बनेको देखिन्छ।
यस क्षेत्रमा प्रतिस्पर्धा भने कडा छ। नेपाली कांग्रेसका अतहर कमाल मुसलमान, नेपाल कम्युनिष्ट पार्टी (एमाले) का विश्राम प्रसाद थारु, राष्ट्रिय स्वतन्त्र पार्टीका मोहन आचार्य तथा स्वतन्त्र उम्मेदवार आशिष शर्मा पनि मैदानमा छन्। पुराना राजनीतिक अनुहार र नयाँ दावेदारबीचको प्रतिस्पर्धाले चुनावलाई रोचक बनाएको छ।
स्थानीय मतदाताबीच ‘संगठन कि व्यक्तित्व?’ भन्ने बहस तीव्र छ। केही मतदाताले दलको झण्डाभन्दा उम्मेदवारको व्यक्तिगत विश्वसनीयता, पारदर्शिता र सामाजिक योगदानलाई प्राथमिकता दिनुपर्ने तर्क राखिरहेका छन्। तर राजनीतिक विश्लेषकहरू भने संगठनात्मक सञ्जाल, मत परिचालन र निर्वाचन व्यवस्थापन अन्तिम नतिजामा निर्णायक बन्ने बताउँछन्।
उम्मेदवार कुँवरले आफू विकास, सुशासन र पारदर्शितालाई प्राथमिक एजेन्डा बनाएर अघि बढेको दाबी गर्दै मतदाताबाट सकारात्मक प्रतिक्रिया पाइरहेको बताएका छन्। अब प्रश्न यही छ–कपिलवस्तु–१ मा यसपटक संगठनको बल भारी पर्ला कि व्यक्तित्वको प्रभाव निर्णायक बन्नेछ? परिणामले नै त्यसको जवाफ दिनेछ।
