कपिलवस्तु, २४ असार।
बाणगंगा नगरपालिका–१ स्थित पिपरा अस्पतालले पिपरा कोठी महिला सेवा सामुदायिक वन उपभोक्ता समितिबाट प्राप्त स्वास्थ्य सामग्रीप्रति आभार व्यक्त गरेको छ। समितिले आफ्नो सामाजिक उत्तरदायित्व कार्यक्रमअन्तर्गत अस्पतालको आवश्यकताअनुसार अत्यावश्यक स्वास्थ्य सामग्री उपलब्ध गराएको हो।
समितिले अस्पताललाई उपचार तथा स्वास्थ्य सेवा प्रवाहलाई थप प्रभावकारी बनाउन आवश्यक इन्स्ट्रुमेन्ट ट्रली हस्तान्तरण गरेको जनाएको छ। उक्त सामग्रीले दैनिक स्वास्थ्य सेवा सञ्चालनलाई सहज बनाउनुका साथै उपचार सेवाको गुणस्तर अभिवृद्धि गर्न महत्वपूर्ण योगदान पुग्ने अस्पतालले जनाएको छ।
अस्पतालले सहयोगी संस्थाप्रति धन्यवाद व्यक्त गर्दै स्थानीय समुदायको स्वास्थ्य सेवा सुदृढ बनाउन सामुदायिक संस्थाहरूको सहकार्य अत्यन्त महत्वपूर्ण रहेको उल्लेख गरेको छ। साथै आगामी दिनमा पनि यस्ता सहयोग र सहकार्यले निरन्तरता पाउने अपेक्षा व्यक्त गरेको छ।
सामुदायिक वन उपभोक्ता समितिहरू वन संरक्षणमा मात्र सीमित नभई शिक्षा, स्वास्थ्य, वातावरण संरक्षण तथा सामाजिक विकासका क्षेत्रमा पनि सक्रिय योगदान पुर्याउँदै आएका छन्। पिपरा कोठी महिला सेवा सामुदायिक वन उपभोक्ता समितिले गरेको यो सहयोगले सामुदायिक संस्थाहरू स्थानीय विकासका भरपर्दा साझेदार भएको सन्देश दिएको छ।
स्थानीय स्रोत, साधन र सामुदायिक संस्थाहरूबीचको सहकार्यबाट स्वास्थ्य संस्थाको क्षमता अभिवृद्धि हुने, सेवाग्राहीले गुणस्तरीय स्वास्थ्य सेवा प्राप्त गर्ने तथा समुदायमा सामाजिक उत्तरदायित्व र सहकार्यको भावना अझ मजबुत बन्ने विश्वास गरिएको छ।