कपिलवस्तु, माघ ०२ । कपिलवस्तु उद्योग वाणिज्य संघको अधिवेशन मिति नजिकै आउँदै छ । १४ औँ वार्षिक साधारण सभा तथा सातौँ अधिवेशनबाट ७७ माघमा डोलकराम घिमिरे अध्यक्ष चयन भएका थिए । उनको ३ वर्षे कार्यकाल अब सकिँदै छ । तोकिएकै मितिमा भए संघको १५ औँ वार्षिक साधारण सभा तथा आठौँ अधिवेशन आसन्न माघ २३ गते हुने छ ।
संघको अधिवेशन मिति नजिकिँदै गर्दा अबको नेतृत्व कसको हुने भन्नेबारे चर्चा भइरहेको छ । अहिलेसम्म चर्चामा कांग्रेसबाट रुक बहादुर भुसाल छन् भने एमालेबाट मोहन न्यौपाने छन् । यस्तै राष्ट्रिय स्वतन्त्र पार्टीबाट पनि अध्यक्षमा आकांक्षा राखिरहेका छन् । यिमध्ये अन्तिमसम्म कोको रहन्छन् भन्ने कुरा केही दिनपछि टुङ्गिने छ । किनकि पार्टीले पनि आधिकारिक उम्मेदवार तय गरेका छैनन् ।
यो बीचमा अहिले मिडियामा चर्चामा नआएका अध्यक्षका आकांक्षी छन् गल्ला तथा हार्डवेयर व्यवसायी टोपनारायण बेलबासे । उद्योग ब्यापार महासङ्घका केन्द्रिय सदस्यसमेत रहेका बेलबासे यसअघि कपिलवस्तु उद्योग वाणिज्य सङ्घमा लामो समय काम गरिसकेका व्यक्ति हुन् । उनै बेलबासेले आफूमा सर्वसम्मति भए संघको नेतृत्व लिन तयार रहेको बताएका छन् ।
आन्तरिक रुपमा यस अप्सनबारे छलफल भइरहेको भए पनि बेलबासेको नाम अहिले मिडियामा आएको छैन । तर धेरै व्यवसायीको इच्छा एकपटक बेलबासेलाई नेतृत्व दिएर न्याय दिने हो कि भन्ने रहेको पाइन्छ ।
बेलबासे भन्छन् ‘सबैको साथ रहेमा उद्योग वाणिज्य संघको नेतृत्व लिन तयार छु । सबै व्यापारी, व्यवसायीको चाहना एक पटक बेलबासे नेतृत्वमा पुगोस् भन्ने रहेको मैले पाएको छु । मलाई काँग्रेस, एमाले, माओवादी, स्वतन्त्र लगायतबाट पनि समर्थन र सहयोग रहन्छ जस्तो लाग्छ । सङ्घमा चुनाव नगराएर सर्वसम्मति हुन्छ भने अर्को कमब्याक हुन तयार छु ।’
बेलबासेले थपे ‘बिभिन्न कारणले अर्को सङ्घमा भए पनि माया उद्योग वाणिज्य संघमै छ । त्यहाँ पसिना छ । मूल्य छ । योगदान छ । सबैले आउनुहोस् भन्नुहुन्छ भने म तयार नै छु । संघ हाँक्ने अनुभव रे सक्षमता पनि छ । मलाई साथीहरूले अध्यक्ष बन्न भनिरहनुभएको छ । मेरो पक्षमा आधा बढी पूर्वअध्यक्ष र अहिलेका पदाधिकारी पनि रहेका छन्’ उनले अघि भने ।
केही पूर्व अध्यक्ष बेलबासेलाई सर्वसम्मत अध्यक्ष बनाउनुपर्ने लबिङमा रहेको कतिपय व्यवसायीले बताए । बेलबासेलाई राजनैतिक आँखाबाट नहेरेर उनको योग्यता र उद्योग व्यवसाय क्षेत्रमा गरेको योगदानको मूल्याङ्कनका आधारमा सबै सर्वसम्मतिमा जानुपर्नेमा कतिपय व्यवसायी छन् ।
बेलबासेले चुनाव लडेर संस्थालाई बिगार्नतर्फ आफ्नो सोच नरहेकाले बताए । उनले भने ‘सर्वसम्मति भए मात्र नेतृत्व लिन तयार छु । साथीसाथीमा लड्ने भिड्ने कार्यले संस्था बिग्रन्छ । म भए पनि नभएपनि अरु साथीहरूलाई पनि नलड्न अनुरोध गर्दछु ।’
नेतृत्वमा पुगे सङ्घलाई नयाँ उचाइमा पुर्याउन हर प्रयास गर्ने बेलबासेले दावी गरे । यता पूर्व वरिष्ठ उपाध्यक्ष रुक बहादुर भुसाल र पूर्वकोषाध्यक्ष तथा हालका लेखा समिति संयोजक मोहन न्यौपाने एक कदम अघि बढिसकेकाले बेलबासेको पक्षमा सर्वसम्मति हुने झिनो आशा देखिन्छ । यद्यपि बेलबासेले उनीहरूलाई पनि मनाउन प्रयास गरेको बुझिन्छ ।