कपिलवस्तु, मंसिर २१
कपिलवस्तु उद्योग वाणिज्य संघद्वारा आयोजित १५औं कपिलवस्तु महोत्सवमा आज चर्चित गायिका समीक्षा अधिकारीले आफ्नो प्रस्तुति दिने भएकी छिन् । “सक्षम व्यवसायी, समुन्नत राष्ट्र र आत्मनिर्भर अर्थतन्त्र” भन्ने नारासहित मंसिर १९ गतेदेखि सुरु भएको महोत्सवको तेस्रो दिनमा अधिकारी आउने कार्यक्रम रहेको छ ।
मनोरञ्जन तथा सांस्कृतिक कार्यक्रम संयोजक रामजी सेनका अनुसार गायिका अधिकारीले बुद्ध रंगशालामा दर्जनभन्दा बढी लोकप्रिय गीत प्रस्तुत गरी दर्शकहरूलाई मनोरञ्जन दिनेछिन् । आजको कार्यक्रमका लागि समीक्षासँगै विक्रमबाबु विक, विष्णु ठट्टाराई, र श्याम बोहोरा पनि महोत्सवमा सहभागी हुनेछन् ।
यस्तै, भोलि शनिबार चर्चित गायिका शान्ता रानी परियारको प्रस्तुति रहने जानकारी दिइएको छ। उनले आफ्नो चर्चित गीत “म त ढलेँढलेँ” सहित अन्य गीतहरू प्रस्तुत गर्नेछिन् ।
महोत्सवअन्तर्गत १३औं कपिलवस्तु डान्स आइडलमा सहभागी १५ प्रतिस्पर्धीले विहीबार आफ्नो प्रस्तुति दिएका थिए । ती प्रस्तुतिका आधारमा आज केही प्रतिस्पर्धी बाहिरिने निर्णय गरिनेछ । महोत्सवले सांस्कृतिक तथा मनोरञ्जनात्मक कार्यक्रममार्फत दर्शकहरूलाई भरपुर मनोरञ्जन प्रदान गर्न प्रयासरत रहेको छ।