१६, बैशाख
पाल्पाको तिनाउ(२ नुवाकोटबाट बुटवल फर्किँदै गरेको स्कुटर दुर्घटना हुँदा २ युवतीले ज्यान गुमाएका छन् ।
राजमार्ग सुरक्षा तथा ट्राफिक व्यवस्थापन कार्यालय बुटवलका प्रहरी निरीक्षक रुद्र गिरीका अनुसार ३ जना सवार स्कुटर आफै अनियन्त्रित भई सडकदेखि करिब २५ /३० मिटर तल खसेको थियो ।
मृत्यु हुनेमा बुटवल उपमहानगरपालिका वडा नम्बर ११ कालिका नगरको राम पथ बस्ने १८ वर्षीया पूर्णिमा उचई मगर र कपिलवस्तु वाणगंगा नगरपालिका ९ भलवाडकी १९ वर्षीया निशा कुँवर रहेको प्रहरीले जनाएको छ ।
स्कुटर चालक वाणगंगा ९ कै २० वर्षीय सुमन श्रेष्ठ घाइते भएका छन् । उनीहरू लु ३५ प ५७६६ नम्बरको एउटै स्कुटरमा सवार थिए ।
मङ्गलवार साँझ करिब पौने सात बजे भएको दुर्घटनापछि उनीहरूलाई उद्धार गरी बेलबासकै एडमनसिटी अस्पतालमा लगिएको थियो भने थप उपचारका लागि लुम्बिनी प्रादेशिक अस्पतालमा ल्याइएको थियो ।
दुर्घटनामा परेका २ युवतीलाई प्रादेशिक अस्पतालका चिकित्सकले मृत घोषणा गरेका थिए । घटना बारे थप अनुसन्धान जारी रहेको प्रहरीले जनाएको छ ।