कपिलवस्तु, ०३ असोज । बाणगंगा नगरपालिका–८ स्थित मधुवन सामुदायिक वन उपभोक्ता समूहले रसुवाको भोटेकोशी बाढीबाट प्रभावित नागरिकको राहत तथा उद्धारका लागि १ लाख १ हजार रुपैयाँ सहयोग गरेको छ ।
बाढीबाट ठूलो जनधनको क्षति भएपछि प्रभावित परिवारलाई राहत र पुनःस्थापनामा सहयोग पुर्याउने उद्देश्यले सामुदायिक वनले उक्त रकम उपलब्ध गराएको हो ।
मधुवन सामुदायिक वन उपभोक्ता समूहका अध्यक्ष दिपककुमार सापकोटाले विपद्को पीडामा रहेका नागरिकलाई आफ्नो क्षमताअनुसार सहयोग गर्नु सामाजिक दायित्व भएको बताए । बाढी प्रभावित परिवारको राहत तथा पुनःस्थापनामा थोरै भए पनि योगदान पुगोस् भन्ने उद्देश्यले सहयोग गरिएको उनको भनाइ छ ।
सामुदायिक वनहरू सामान्यतया वन संरक्षण, व्यवस्थापन र उपभोक्ताको हितसँग जोडिए पनि पछिल्लो समय विपद् तथा सामाजिक संकटका बेला सहयोगी भूमिकासमेत निर्वाह गर्दै आएका छन् । मधुवन सामुदायिक वनको यो सहयोगले पनि वन उपभोक्ता समूहको सामाजिक उत्तरदायित्वतर्फको भूमिकालाई देखाएको छ ।
अध्यक्ष सापकोटाले विपद्का बेला राज्यका निकायसँगै समुदाय, संघसंस्था र सामाजिक संस्थाको सहयोग आवश्यक हुने बताए । राहत तथा पुनःस्थापनाका लागि जुटिरहेको सहयोगले प्रभावित परिवारलाई केही सहज हुने अपेक्षा गरिएको उनले बताए ।
मधुवन सामुदायिक वनले वन संरक्षण र व्यवस्थापनसँगै समुदायको आवश्यकता र विपद्का समयमा सामाजिक सहयोगलाई समेत निरन्तरता दिने जनाएको छ ।