कपिलवस्तु, ०२ असोज। चाडपर्व नजिकिँदै गर्दा कपिलवस्तु उद्योग वाणिज्य संघले आयोजना गरेको शुभकामना आदान–प्रदान कार्यक्रम औपचारिक शुभकामनामा मात्रै सीमित रहेन । कार्यक्रममा बाणगंगाको विकास, विपद्का बेला सहयोग, स्थानीय प्रशासनसँगको समन्वय तथा सामाजिक सद्भावका विषयले समेत स्थान पाए ।
चार नम्बर जितपुरस्थित संघको सभा हलमा आयोजित कार्यक्रममा इलाका प्रहरी कार्यालय पिपरामा प्रमुखका रूपमा आउनुभएकी प्रहरी निरीक्षक कालिका कार्की र इलाका प्रशासन कार्यालय बाणगंगाका प्रमुख बाबुराम पोखरेललाई स्वागत गरिएको थियो । नयाँ प्रहरी तथा प्रशासन नेतृत्वको आगमनसँगै स्थानीय उद्योगी–व्यवसायी र सुरक्षा तथा प्रशासनिक निकायबीच आगामी दिनमा कस्तो समन्वय हुन्छ भन्ने विषय पनि चासोको विषय बनेको छ।
कार्यक्रममा बाणगंगा नगरपालिकाका नगर प्रमुख चक्रपाणी अर्यालले चाडपर्वको शुभकामना दिँदै भोटेकोशीमा भएको विपत्तिलाई स्मरण गर्नुभयो । उहाँले विपत्तिको समयमा राहतका लागि सबै पक्षले सक्दो सहयोग गर्नुपर्नेमा जोड दिनुभयो ।
तर कार्यक्रमको अर्को महत्वपूर्ण पक्ष भने नगर प्रमुख अर्यालले बाणगंगाको सामाजिक अवस्थाबारे गरेको दाबी थियो । उहाँले बाणगंगामा नागरिकबीच धार्मिक तथा जातीय द्वन्द्व नरहेको बताउँदै विकासका सवालमा नागरिक एकजुट हुनु नगरपालिकाको सबल पक्ष भएको उल्लेख गर्नुभयो ।
नगर प्रमुखको यो भनाइले बाणगंगामा सामाजिक सद्भावको अवस्था र विकास निर्माणमा स्थानीय तह, निजी क्षेत्र तथा नागरिक समाजबीचको सम्बन्धबारे बहसको आधारसमेत प्रस्तुत गरेको छ। सामाजिक सद्भावलाई विकासको आधार मान्ने हो भने आगामी दिनमा त्यसलाई व्यवहारमै कसरी संस्थागत गर्ने भन्ने प्रश्न भने खुलै छ ।
यता, कपिलवस्तु उद्योग वाणिज्य संघका अध्यक्ष गणेशबहादुर क्षेत्रीले स्थानीय तहको विकासमा संघ सहकार्यका लागि तयार रहेको बताउनुभयो । उहाँले उद्योगी–व्यवसायीका समस्या समाधान गर्न सबै पक्ष एकजुट हुनुपर्ने धारणा राख्नुभयो ।
अध्यक्ष क्षेत्रीको भनाइले निजी क्षेत्रले स्थानीय सरकारसँग सहकार्यलाई प्राथमिकतामा राखेको देखाउँछ । तर उद्योगी–व्यवसायीले भोगिरहेका समस्या, व्यवसाय सञ्चालनको वातावरण, बजार व्यवस्थापन, पूर्वाधार तथा प्रशासनिक सहजीकरणजस्ता विषयमा आगामी दिनमा यस्तो सहकार्य कति प्रभावकारी हुन्छ भन्ने कुरा व्यवहारबाटै देखिनेछ ।
कार्यक्रममा नेपाल उद्योग वाणिज्य महासंघका केन्द्रीय सदस्य यज्ञप्रसाद भट्टराई, कपिलवस्तु उद्योग वाणिज्य संघका पूर्व अध्यक्ष विष्णुप्रसाद न्यौपाने, वरिष्ठ समाजसेवी रुकबहादुर भुसाल, इलाका प्रशासन कार्यालय बाणगंगाका प्रमुख बाबुराम पोखरेल, उद्योग व्यापार संघ कपिलवस्तुका अध्यक्ष टोपनारायण बेल्बासे, श्रृङ्गीघाट सामुदायिक वनका अध्यक्ष गणेशबहादुर सिंह ठकुरी ‘शुसिल’, रोटरी क्लब अफ कपिलवस्तु मिडटाउनका अध्यक्ष रोमाकान्त घिमिरेलगायतले शुभकामना मन्तव्यसँगै विभिन्न समसामयिक विषयमा धारणा राख्नुभएको थियो ।
कार्यक्रममा बाणगंगाका विभिन्न संघसंस्था तथा सामाजिक क्षेत्रका प्रमुख एवं प्रतिनिधिको सहभागिता थियो । यसले उद्योग वाणिज्य संघले निजी क्षेत्रसँगै प्रशासन, स्थानीय सरकार र सामाजिक संस्थाबीचको सम्बन्धलाई एउटै मञ्चमा जोड्ने प्रयास गरेको देखिन्छ ।
कपिलवस्तु उद्योग वाणिज्य संघका अध्यक्ष गणेशबहादुर क्षेत्रीको अध्यक्षता, वरिष्ठ उपाध्यक्ष हुमनाथ पौडेलको स्वागत मन्तव्य तथा महासचिव नवदत्त घिमिरेको सञ्चालनमा कार्यक्रम सम्पन्न भएको हो ।