काठमाडौं । प्रधानमन्त्री पुष्पकमल दाहाल प्रचण्डले प्रतिनिधिसभाबाट दोस्रोपटक विस्वासको मत पाएपछि मन्त्रिपरिषद विस्तार गर्ने तयारी गएका छन् ।
प्रधानमन्त्री निवास बालुवाटारमा कांग्रेसका सभापति शेरबहादुर देउवा र उपसभापति पूर्णबहादुर खड्कासँग छलफलपछि सोमबार मन्त्रिपरिषद विस्तार गर्ने तयारीमा प्रचण्ड पुगेका हुन् ।
सरकारलाई दिएको समर्थन फिर्ता लिँदै सरकारबाट एमाले र राप्रपा बाहिरिएपछि प्रधानमन्त्री प्रचण्डले चैत ६ गते विश्वासको मत लिएका थिए । कांग्रेस सबैभन्दा ठूलो दल भएकाले यसअघि एमालेले पाएको संख्या बाराबर मन्त्रालयमा आफूहरूको दाबी रहेको खड्काले बताए ।
‘हामीले प्रधानमन्त्रीज्यूसँग एमालेले पाएको संख्या बराबर मन्त्रालय दाबी गरेका छौं । यसविषयमा छलफल जारी छ । भोलिसम्म हामी सरकारमा सहभागी हुनेछौं’, उनले भने ।
यसअघि एमालेले पाएका मन्त्रालय नै कांग्रेसले पाउने लगभग पक्का भएको कांग्रेसका एक पदाधिकारीले बताएका छन् । मन्त्रालय भागबण्डामा कांग्रेसले ८ मन्त्रालय पाउने निश्चित भएपनि केही मन्त्रालयमा कुरा नमिलेको ती नेताले बताए ।
‘गृहमन्त्रालय माओवादीले लिने भएपछि अर्थ, रक्षा, परराष्ट्र, स्वास्थ्य, उद्योग बाणिज्य मन्त्रालय हामीले पाउने लगभग सहमति भएको छ । केही मन्त्रालयमा कुरा मिल्न बाँकी भएकाले आइतबारसम्म मन्त्रालय बाँडफाँटमा टुंगोमा पुर्याउने छौं’, ती नेताले भने ।
तत्कालीन मन्त्रिपरिषद्मा एमालेले अर्थ, परराष्ट्र, रक्षा, स्वास्थ्य, उद्योग वाणिज्य तथा आपूर्ति, भूमिसुधार सहकारी तथा गरिबी निवारण कृषि तथा पशुपन्छी महिलो, बालबालिका तथा ज्येष्ठ नागरिक मन्त्रालय लिएको थियो ।
कांग्रेसबाट खड्काले उपप्रधान तथा अर्थमन्त्रालयको जिम्मेवारीसहित नेतृत्व लिने लगभग पक्का भएको छ । अन्य मन्त्रीमा शेखर पक्षबाट अर्जुन नरसिंह केसी, धनराज गुरुङ, डीगबहादुर लिम्बूमध्ये २ जना मन्त्री बन्ने सम्भावना रहेको छ ।
त्यस्तै परराष्ट्रमा डा. प्रकाशशरण महत आउने सम्भावन रहेको छ । यसैगरी सीता गुरुङ, रामहरी खतिवडाले मन्त्रीमा दाबी गरेका छन् । रमेश रिजाल, किशोरसिंह राठोर, एनपी साउद मन्त्री बन्ने लाइनमा छन् । कांग्रेसले यो पटक योग्यता, योगदान र समावेशीताको आधारमा मन्त्री छान्न लागिएको हो ।