बाणगंगा,२१ मंसिर । कपिलवस्तु उद्योग वाणिज्य संघद्वारा आयोजित १५औं कपिलवस्तु महोत्सव गायिका समीक्षा अधिकारीको जोशिलो प्रस्तुति र प्रेरणादायी भनाइका कारण थप आकर्षणको केन्द्र बन्यो । उनले आफ्ना लोकप्रिय गीतहरू प्रस्तुत गर्दै महोत्सवमा सहभागी दर्शकहरूको मन जितिन्। कार्यक्रमको बीचमा उनले बारम्बार ”नबिराउनु, नडराउनु” भन्ने प्रेरणादायी सन्देश दिँदै उपस्थित दर्शकहरूलाई आत्मविश्वास बढाउने प्रयास गरिन्। उनको यो भनाइले महोत्सवलाई सांगीतिक रमाइलोसँगै प्रेरणाको क्षण पनि बनाएको थियो।
समीक्षा अधिकारीको प्रस्तुति हेर्न भीड लागेको थियो। गीतहरूमा दर्शकहरू हात हल्लाउँदै, नाच्दै र गाउनसम्म सहभागी भए। उनका चर्चित गीतहरूले माहोल झन् रौनकपूर्ण बनाएको थियो।
उनले विशेषतः युवा पुस्तालाई सम्बोधन गर्दै आफ्नो क्षमतामा विश्वास राख्न र जुनसुकै चुनौतीको सामना गर्न नडराउन प्रेरित गरिन्। उनका शब्दहरूमा आत्मविश्वास र जोश झल्किन्थ्यो।
कार्यक्रममा उपस्थित एक दर्शकले भने, ”समीक्षाको प्रस्तुति प्रेरणादायी र रमाइलो दुवै थियो। उनले हामीलाई गीतमार्फत मनोरञ्जन मात्रै होइन, नयाँ जोश पनि दिइन्।” यो सन्देश गायिका समीक्षा अधिकारीको जीवनमा आफैँले सिकेका पाठहरूको प्रतिविम्ब हुनसक्छ, जुन उनले दर्शकहरूसँग साझा गरिन् ।
महोत्सवमा समीक्षा अधिकारीको प्रस्तुति मात्र होइन, स्थानीय कलाकारहरूको नृत्य, सांस्कृतिक कार्यक्रम, तथा विभिन्न स्टलहरूले पनि दर्शकहरूलाई आकर्षित गरिरहेका छन्। महोत्सवले स्थानीय व्यवसाय प्रवर्द्धनमा समेत सकारात्मक प्रभाव पारेको आयोजकहरूले बताए ।
१५औं कपिलवस्तु महोत्सव पौष २ गतेसम्म चल्नेछ। आयोजकका अनुसार यस महोत्सवले स्थानीय कला, संस्कृति, र उद्योग प्रवर्द्धनमा महत्वपूर्ण योगदान दिने अपेक्षा गरिएको छ।