बाणगंगा, फागुन १९ ।
बाणगंगा नगरपालिकाका ट्याक्टर धनी तथा मजदुरहरू रोजगारी गुम्ने डरले आन्दोलनको तयारीमा जुटेका छन् । नदीजन्य पदार्थको ओसारपसार तथा निकासी प्रक्रियामा स्थानीय ट्याक्टर धनी र मजदुरलाई उपेक्षा गरिएको भन्दै उनीहरूले फागुन २० गते नगरपालिका कार्यालय घेराउ गर्ने घोषणा गरेका छन् ।
नेपाल किसान ट्याक्टर समिति, कपिलवस्तुका अध्यक्ष झविन्द्र खनालको अध्यक्षतामा बसेको बैठकले स्थानीय ट्याक्टर व्यवसायी तथा मजदुरहरूको अधिकार रक्षा गर्न संघर्ष गर्ने निर्णय गरेको हो । बैठकमा नगरपालिकाले नदीजन्य पदार्थको ठेक्कापट्टामा बाहिरी समूहलाई प्राथमिकता दिँदा स्थानीय मजदुर र ट्याक्टर व्यवसायीलाई असर पर्ने भन्दै आपत्ति जनाइएको छ ।
अध्यक्ष खनालका अनुसार स्थानीय ट्याक्टर धनी र मजदुरलाई रोजगारीबाट बञ्चित गर्ने प्रयास भइरहेको छ । उनले नगरपालिका प्रशासनलाई यस विषयमा तत्काल ध्यान दिन आग्रह गर्दै माग पूरा नभए आन्दोलन चर्काउने चेतावनी दिए ।
खनालले सबै ट्याक्टर धनी, मजदुर तथा लेवरहरूलाई आन्दोलनमा सहभागी हुन आह्वान गरेका छन् । यदि मागहरू सम्बोधन नभए थप कडा आन्दोलनका कार्यक्रम सार्वजनिक गरिने उनीहरूले बताएका छन् ।
ट्याक्टर व्यवसायी तथा मजदुरहरूले नगरपालिकासँग न्यायोचित व्यवहारको माग गर्दै संघर्षका कार्यक्रम अगाडि बढाउने बताएका छन्। स्थानीय मजदुरहरू अन्यायमा परेमा कडा कदम चाल्न बाध्य हुने उनीहरूको चेतावनी छ ।