स्याङ्जा ।
फेदीखोला गाउँपालिकाले आर्थिक अवस्था कमजोर भएका गाउँपालिकावासीलाई आर्थिक सहयोग गर्ने भएको छ। कोभिड–१९ को दोस्रो संक्रमण बढ्दै गएको अवस्थामा पनि गाउँपालिकामा संक्रमण देखिएका बिरामी स्वास्थ्य परीक्षणमा चासो नदेखाएको र आर्थिक अवस्था कमजोर हुँदा उपचारमा समस्या आएको भन्दै गाउँपालिकाले पालिकावासीलाई उपचारमा हौसला प्रदान गर्न आर्थिक सहयोग गर्ने निर्णय गरेको गाउँपालिकाले जनाएको छ।
गाउँपालिका अध्यक्ष घनश्याम सुवेदीले बजेट अभावमा उपचारमा समस्या नहोस् भनेर अर्थिक अवस्था कमजोर भएका पालिकावासीलाई उपचारमा सहयोग पुगोस् भनेर १५ हजार रुपैयाँसम्म दिने निर्णय भएको बताए। अध्यक्ष सुवेदीले भने, ‘कोरोना पोजेटिभ देखिए पनि आर्थिक अभावमा अस्पताल नगएर घरमै थलिएर बसेको अवस्थामा पालिकाले दिने उपचार खर्चले सहयोग पुग्छ र यसले संक्रमणलाई लुकाउने कार्यमा कमी आउँछ।’
बिरामीले अस्पतालमा स्वास्थ्योपचार गराएको कागजपत्रका आधारमा गाउँपालिकाको कार्यालयमा उपचार खर्च गरेको अवस्थामा रकम उपलब्ध गराउने अध्यक्ष सुवेदीले बताए।
गाउँपालिकाका प्रशासकीय प्रमुख चिरञ्जीवी बरालले गाउँपालिकाभित्र ४९ जना संक्रमित रहेको र जसमध्ये नौजना संक्रमण निको भएर घर फर्किएको र एकजना संक्रमित महिलाको मृत्यु भएको जानकारी दिए।
गाउँपालिकाले कोरोना महामारीमा स्वास्थ्य उपचारमा सहयोग पुर्याउने उद्देश्यअनुसार पालिकाभित्र दुईवटा एम्बुलेन्स सञ्चालनमा ल्याएको र कोरोना संक्रमित बिरामी र सुत्केरीको उपचारका लागि छुट्टाछुट्टै एम्बुलन्सद्वारा निःशुल्क सेवासमेत दिँदै आएको प्रशासकीय प्रमुख बरालले बताए।
गाउँपालिकाले २० शय्याको अक्सिजनसहितको अस्पताल सञ्चालनमा ल्याएको र कोरोना संक्रमितलाई संक्रमितको घरघरमै पुगेर औषधिसमेत वितरण गर्दै आएको गाउँपालिकाले जनाएको छ।
जिल्लामा यो समाचार तयार पार्दासम्म कुल एक हजार ८४२ जना संक्रमित भएका छन् भने ३२० जना निको भएर घर फर्किएका छन्।
मृत्यु हुनेको संख्या ७९ पुगेको छ भने विभिन्न ६४ जना संक्रमितको विभिन्न अस्पतालमा उपचार भइरहेको जिल्ला स्वास्थ्य कार्यालयका सूचना अधिकारी मित्रप्रसाद अर्यालले जानकारी दिए।
जिल्ला स्वास्थ्य कार्यालयका अनुसार होम आइसोलेसनमा एक हजार ३४३ छन् भने क्वारेन्टिनमा ३६ जना छन्। जिल्लामा २९७ आइसोलेसन शय्या र २४९ अक्सिजन सिलिन्डर रहेको स्वास्थ्य कार्यालयले जनाएको छ।
स्थानीय तहको चासो खोपतिर
जिल्लामा कोरोना संक्रमणका कारण दैनिकजसो बिरामीको मृत्यु हुन थालेपछि स्थानीय तहका प्रमुखहरुले खोप खरिदप्रति चासो देखाउन थालेका छन्।
कोरोना संक्रमणबाट बचाउन खोपको अतिआवश्यकता भएको भन्दै स्थानीय तहका प्रमुखहरूले यसतर्फ चासो देखाएका हुन्।
वालिङ नगरपालिकाले कोभिडविरुद्धको खोप उपलब्ध गराउन स्वास्थ्य मन्त्रालयलाई पत्र लेखेर अनुरोध गरेको छ भने हरिनास गाउँपालिकाका अध्यक्ष खिमनारायण मानन्धरले जनता बचाउनका लागि खोपको अति आवश्यक भएको भन्दै यस आर्थिक वर्षको सबै विकास बजेट कटाएर खोप खरिद गर्न तयार रहेकाले खोप किन्न पाइने ठाउँको खोजी गर्न आग्रह गरेका छन्।
वालिङ नगरप्रमुख दिलीपप्रताप खाँणद्वारा हस्ताक्षरित पत्रमा वालिङका नागरिकले खोपको अत्यधिक माग गरेकाले मन्त्रालयबाट उपलब्ध गराउन आग्रह गरेका छन्।
नगरप्रमुख खाँणले मन्त्रालयबाट उपलब्ध गराउन सम्भव नभए नगरपालिकाले आफ्नै खर्चमा खोप खरिद गर्ने वातावरण सिर्जना गर्न र नगरपालिकाले खोप खरिद गर्न तयार रहेकाले खरीदका लागि अनुमति दिन पत्रमा उल्लेख गरिएको छ।
हरिनास गाउँपालिका अध्यक्ष खिमनारायण मानन्धरले सरकार पहिला जनता बचाउन लाग्नुपर्ने बताउँदै विकास र राजनीति पछि गर्दै गरौँला भनेका छन्। मानन्धरले खोप जसले किने पनि जनताकै पैसा भएकाले खोप किन्न पाइने ठाउँको खोजी गर्नसमेत अध्यक्ष मानन्धरले आग्रह गरेका छन्।
जिल्लामा कुल एक हजार ८४२ जना संक्रमित भएका छन् भने ३२० जना निको भएर घर फर्किएका छन्।
मृत्यु हुनेको संख्या ७९ पुगेको छ भने विभिन्न ६४ जना संक्रमितको विभिन्न अस्पतालमा उपचार भइरहेको जिल्ला स्वास्थ्य कार्यालयका सूचना अधिकारी मित्रप्रसाद अर्यालले जानकारी दिए।
जिल्ला स्वास्थ्य कार्यालयले दिएको जानकारीअनुसार होम आइसोलेसनमा एक हजार ३४३ जना छन् भने क्वारेन्टिनमा ३६ जना छन्। जिल्लामा २९७ आइसोलेसन शय्या र २४९ अक्सिजन सिलिन्डर रहेको स्वास्थ्य कार्यालयले जनाएको छ। रासस