लुम्बिनी प्रदेशकै उत्कृष्ट आधारभूत विद्यालयको सम्मान बाणगंगाको सूर्योदयलाई, वडा अध्यक्ष र प्रधानाध्यापक पनि सम्मानित

बाणगंगा, ६ मंसिर । कपिलवस्तुको बाणगंगा नगरपालिका–८ स्थित सूर्योदय आधारभूत विद्यालयले राष्ट्रियस्तरमा उत्कृष्ट आधारभूत विद्यालयको सम्मान प्राप्त गरेको छ। सामुदायिक विद्यालयको शैक्षिक गुणस्तर, संस्थागत विकास र नेतृत्व क्षमताको मूल्यांकन गर्दै प्रधानाध्यापक संघ नेपालले विद्यालयलाई लुम्बिनी प्रदेशकै उत्कृष्ट आधारभूत विद्यालयका रूपमा सम्मानित गरेको हो ।

जनकपुरधाममा मंसिर ४ देखि ६ गतेसम्म आयोजित प्रधानाध्यापक संघ नेपालको तेस्रो राष्ट्रिय शिखर सम्मेलन–२०८३ मा सूर्योदय आधारभूत विद्यालयले उक्त सम्मान प्राप्त गरेको हो । नेपालका प्रथम राष्ट्रपति डा. रामवरण यादवको प्रमुख आतिथ्यतामा मंसिर ४ गते सम्पन्न सम्मेलनको उद्घाटन समारोहमा विद्यालयलाई सम्मान प्रदान गरिएको थियो ।

विद्यालयको यो उपलब्धि केवल एउटा संस्थाले प्राप्त गरेको पुरस्कारमा सीमित छैन । सामुदायिक विद्यालयप्रति अभिभावक र समुदायको विश्वास अभिवृद्धि गर्दै स्थानीय तहमा शैक्षिक सुधारका लागि गरिएको सामूहिक प्रयासको राष्ट्रियस्तरमा भएको पहिचानका रूपमा यसलाई हेरिएको छ ।

विद्यालयको शैक्षिक तथा संस्थागत विकासमा योगदान पुर्‍याएको भन्दै बाणगंगा नगरपालिका–८ का वडा अध्यक्ष बाबुराम अर्याल र विद्यालयका प्रधानाध्यापक रेशमलाल खनालसमेत सम्मानित हुनुभएको छ। विद्यालयसँगै स्थानीय जनप्रतिनिधि र शैक्षिक नेतृत्वको सम्मान हुनुले विद्यालय विकासमा स्थानीय सरकार र विद्यालय प्रशासनबीचको सहकार्यलाई समेत उजागर गरेको छ ।

सात प्रदेशका १४ विद्यालयमध्ये सूर्योदय पनि छनोट

‘सँगै मिलेर उत्कृष्ट विद्यालय निर्माण गरौँ’ भन्ने मूल सन्देशसहित आयोजित राष्ट्रिय सम्मेलनमा सातै प्रदेशबाट छनोट भएका ७ आधारभूत र ७ माध्यमिक गरी १४ विद्यालयलाई सम्मान गरिएको थियो।

आधारभूत तहतर्फ कोशी प्रदेशबाट मेवाराजा, मधेसबाट मन मिश्र, बागमतीबाट श्री आधारभूत, गण्डकीबाट सरस्वती, लुम्बिनीबाट सूर्योदय आधारभूत विद्यालय, कर्णालीबाट बलभद्र र सुदूरपश्चिमबाट बालमन्दिर आधारभूत विद्यालय सम्मानित भएका छन् ।

त्यसैगरी माध्यमिक तहतर्फ कोशीबाट फिदिम, मधेसबाट जनता नमुना, बागमतीबाट जनप्रिय, गण्डकीबाट पञ्चदेवमुनी, लुम्बिनीबाट सिद्धबाबा, कर्णालीबाट त्रिपुरेश्वर र सुदूरपश्चिमबाट मालिकार्जुन माध्यमिक विद्यालय सम्मानित भएका छन् ।

देशभरका सामुदायिक विद्यालयमध्ये प्रदेशगत रूपमा छनोट भएर राष्ट्रिय मञ्चमा सम्मानित हुने अवसर प्राप्त गर्नु सूर्योदयका लागि महत्वपूर्ण उपलब्धि हो । यसले कपिलवस्तुको सामुदायिक विद्यालयले पनि शैक्षिक तथा संस्थागत क्षेत्रमा राष्ट्रिय पहिचान बनाउन सक्ने सम्भावना देखाएको छ।

प्रधानाध्यापकदेखि स्थानीय सरकारसम्म सम्मानित

सम्मेलनमा विद्यालयसँगै शैक्षिक नेतृत्व र स्थानीय सरकारको योगदानलाई समेत सम्मान गरिएको थियो। सातै प्रदेशबाट छनोट भएका आधारभूत र माध्यमिक तहका १४ जना प्रधानाध्यापक सम्मानित भएका थिए।

आधारभूत तहतर्फ राजेशप्रसाद यादव, प्रेमकुमारी यादव, बिनिता रञ्जित, विश्वमोहन पोखरेल, गङ्गा शर्मा, ज्ञानु गुरुङ र मानसिंह ऐर सम्मानित हुनुभएको थियो।

माध्यमिक तहतर्फ डा. इन्द्रमोहन झा, गौरीशंकर चौधरी, दलबहादुर बल, शान्त नेपाली, मोहनप्रसाद सापकोटा, खड्क रोकाया र लक्ष्मणदत्त भट्ट सम्मानित हुनुभएको थियो।

यसैगरी भरतपुर महानगरपालिकासहित सातै प्रदेशका उत्कृष्ट नगरपालिका तथा गाउँपालिकासमेत गरी १५ स्थानीय तहलाई सम्मान गरिएको थियो। लुम्बिनी प्रदेशबाट शिवराज नगरपालिका र गुल्मीको धुर्कोट गाउँपालिका पनि सम्मानित भएका छन्।

शिक्षा क्षेत्रमा योगदान पुर्‍याउने व्यक्तित्व र पत्रकार पनि सम्मानित

सम्मेलनमा शिक्षा क्षेत्रमा दीर्घकालीन योगदान पुर्‍याउनुभएका काठमाडौं विश्वविद्यालयका पूर्वउपकुलपति स्वर्गीय प्रा.डा. सुरेशराज शर्मालाई मरणोपरान्त राष्ट्रिय शिक्षा पुरस्कार प्रदान गरिएको थियो।

त्यस्तै उत्कृष्ट शिक्षा पत्रकारिता पुरस्कारबाट अनलाइनखबरका दिनेश गौतम र अन्नपूर्ण पोस्टकी मणिका झा सम्मानित हुनुभएको थियो। पुरस्कारको राशि जनही २५ हजार रुपैयाँ रहेको थियो।

सम्मानित व्यक्ति तथा संस्था छनोटका लागि प्रा.डा. विद्यानाथ कोइरालाको संयोजकत्वमा पाँच सदस्यीय समिति गठन गरिएको थियो। समितिमा रामप्रसाद सुवेदी, नन्दकुमारी महर्जन, दिनेश कुमार श्रेष्ठ र सुदर्शन घिमिरे सदस्य रहनुभएको थियो।

प्रधानाध्यापक संघ नेपालका अध्यक्ष सुदाम गौतमका अनुसार विद्यालय शिक्षाको गुणस्तर अभिवृद्धि, शैक्षिक नेतृत्वको सुदृढीकरण, नवीन शैक्षिक अभ्यास तथा सामुदायिक शिक्षाको रूपान्तरणमा योगदान पुर्‍याएका व्यक्ति र संस्थालाई छनोट गरी सम्मान गरिएको हो।

कपिलवस्तुको शैक्षिक पहिचानमा थपियो नयाँ उपलब्धि

बाणगंगा–८ को सूर्योदय आधारभूत विद्यालयले प्राप्त गरेको राष्ट्रिय सम्मानले स्थानीयस्तरमा सामुदायिक विद्यालयको विकास र गुणस्तरीय शिक्षाका लागि भइरहेका प्रयासलाई थप चर्चामा ल्याएको छ।

विद्यालयको शैक्षिक उन्नति कुनै एक व्यक्तिको प्रयासबाट मात्र सम्भव हुँदैन। विद्यालय व्यवस्थापन समिति, प्रधानाध्यापक, शिक्षक, अभिभावक, स्थानीय सरकार र समुदायबीचको समन्वय तथा सहकार्यले नै विद्यालयको संस्थागत विकासलाई गति दिने गर्छ। सूर्योदयको उपलब्धिले पनि यस्तै सामूहिक प्रयासको महत्वलाई स्थापित गरेको छ।

अब यो सम्मानलाई उपलब्धिमा मात्र सीमित नराखी शिक्षण सिकाइको गुणस्तर, विद्यार्थीको सिकाइ उपलब्धि, प्रविधिमैत्री शिक्षा, समावेशी शैक्षिक वातावरण र संस्थागत सुशासनमा थप सुधार गर्ने अवसरका रूपमा उपयोग गर्नु विद्यालयका लागि महत्वपूर्ण हुनेछ।

सम्मेलनको अन्तिम दिन सामुदायिक विद्यालयको शैक्षिक गुणस्तर सुधार, समतामूलक शैक्षिक पहुँच, शिक्षकको पेसागत मर्यादा तथा शैक्षिक नेतृत्व विकासका विषय समेटिएको ‘जनकपुर घोषणापत्र’ जारी गर्ने कार्यक्रमसमेत राखिएको थियो।

राष्ट्रियस्तरमा उत्कृष्ट आधारभूत विद्यालयको सम्मान प्राप्त गर्न सफल सूर्योदय आधारभूत विद्यालय परिवार, प्रधानाध्यापक रेशमलाल खनाल तथा विद्यालयको विकासमा योगदान पुर्‍याउनुहुने वडा अध्यक्ष बाबुराम अर्याललाई यस उपलब्धिका लागि बधाई तथा शुभकामना व्यक्त गरिएको छ।

प्रतिक्रिया दिनुहोस्